ৰঙাপৰা, 25 জুলাই :মিছামাৰীৰ উত্তৰ দিশত অৱস্থিত সোনাই-ৰূপাই বন্যপ্ৰাণী অভয়াৰণ্যখনত চোৰাং কাঠ ব্যৱসায়ীয়ে চলাই আহিছে বন ধ্বংস যজ্ঞ ৷ আনকি একাংশ চোৰাং কাঠৰ ব্যৱসায়ীৰ বাবে এই স্থান হৈ পৰিছে সোণৰ কণী পৰা হাঁহ (Wood smuggling in Rangapara) ৷ শোণিতপুৰ জিলাত চোৰাং কাঠৰ ৰমৰমীয়া ব্যৱসায় চলি থকাৰ সময়তে দেওবাৰে নিশাৰ ভাগত মিছামাৰী গাভৰু খণ্ড বনকৰ্মীৰ এটা দলে গোপন সূত্ৰৰ খবৰৰ তথ্য ভিত্তিত চলাই এক অভিযান ৷ এই অভিযানত বন বিভাগৰ দলটোৱে চোৰাং কাঠসহ এখন গাড়ী জব্দ কৰিবলৈ সক্ষম হয় (Illegal timber seized by Jiagabharu forest beat) ।
জানিব পৰা মতে, গাভৰু খণ্ড বন কাৰ্যালয়ৰ বন বিষয়া সুৰেশ দাসৰ নেতৃত্বত বনকৰ্মীসকলে তহল দি থকাৰ সময়তে ৰঙাপৰা দিশৰ পৰা মিছামাৰী অভিমুখে আহি আছিল এ এছ 12 এ চি 1969 নম্বৰৰ এখন টাটা ম’বাইল বাহন ৷ তেনে সময়তে বাহনখনৰ চালকে হঠাৎ বনকৰ্মীৰ দলটো প্ৰত্যক্ষ কৰাৰ লগে লগে পথৰ দাঁতিত বাহনখন ৰখাই আন্ধকাৰৰ সুযোগ লৈ চালকজন সেই স্থানৰ পৰা পলায়ন কৰে ৷