ৰঙাপৰা, 18 এপ্ৰিল : মহামাৰী ক’ভিডৰ দ্বিতীয় ঢৌয়ে ৰাজ্যত ভয়াৱহ ৰূপ ধাৰণ কৰিছে । ক’ৰণা সংক্ৰমণৰ প্ৰতিৰোধৰ বাবে ৰাজ্য চৰকাৰে মাস্ক পৰিধান কৰাটো বাধ্যতামূলক কৰিছে যদিও ৰঙাপৰাত ভেকোভাওঁনাত পৰিণত হোৱাৰ অভিযোগ উঠিছে । ৰঙাপৰাত একাংশ ৰাইজে চৰকাৰী নীতি-নিৰ্দেশনা উলংঘন কৰি মাস্ক অবিহনে চহৰখনত ঘূৰি ফুৰাৰ লগতে দৈনিক বজাৰত ব্যৱসায়ীয়ে সামগ্ৰী বিক্ৰী কৰাৰ বিপৰীতে গ্ৰাহকে সামগ্ৰী ক্ৰয় কৰিছে । ৰঙাপৰাত কোনেও পালন কৰা নাই সামাজিক দূৰত্বও ৷
ৰঙাপৰাৰ দৈনিক বজাৰত অভাৱনীয় ভিৰঃ মুখত নাই মাস্ক ৰাজ্যখনত ক'ভিডৰ আক্ৰান্তৰ সংখ্যা ক্ৰমাৎ বৃদ্ধি পোৱাৰ লগতে শোণিতপুৰ জিলাত বহুকেইজনৰ দেহত ক'ভিডৰ লক্ষণ ধৰা পৰাৰ পিচতো ৰঙাপৰাৰ একাংশ ৰাইজ সচেতন হোৱা পৰিলক্ষিত নহ’ল । ৰঙাপৰাত একাংশ ব্যৱসায়ীয়ে নিজৰ লাভৰ স্বাৰ্থত জলাঞ্জলি দিছে সামাজিক দূৰত্বৰ সকলো নীতি নিয়ম । গুৰুত্ব নাই ক’ৰণাৰ দৰে মহামাৰীৰ ভয়াবহতা । দৈনিক বজাৰত সমাজিক দূৰত্ব ভংগ কৰি হাজাৰ হাজাৰ লোকৰ সমাবেশ হোৱাটোৱে ৰঙাপৰাবাসী ৰাইজলৈ যেন এক অশনি সংকেত কঢ়িয়াই আনিছে ৷
লগতে পঢ়ক :ক'ভিড পৰিস্থিতিৰ বাবে স্থগিত জে ই ই মেইনচৰ প্ৰৱেশ পৰীক্ষা
