আমগুৰি ২৫ ছেপ্টেম্বৰ:অসমৰ ইমূৰৰ পৰা সিমূৰলৈ প্ৰচাৰ চলিছে যতীন বৰাৰ 'ৰত্নাকৰ' চলচ্চিত্ৰৰ ৷ বুধবাৰে টিম ৰত্নাকৰে 'ৰত্নাকৰ'ৰ প্ৰচাৰ চলায় শিৱসাগৰ নামতি শ্বহীদ পিয়লি ফুকন মহাবিদ্যালয়ত ৷ অহা ১১ অক্টোবৰত ছবিগৃহলৈ আহিব অসমীয়া চলচ্চিত্ৰ 'ৰত্নাকৰ' ৷ ছবিগৃহলৈ আহিবলগীয়া এই ছবিখনৰ প্ৰচাৰৰ বাবে বুধবাৰে নামতিত উপস্থিত হয় অসমৰ বিশিষ্ট অভিনেতা যতীন বৰা, মোহময়ী অভিনেত্ৰী বৰষাৰাণী বিষয়াকে ধৰি ছবিখনৰ লগত জড়িত বহু কেইজন কলা-কুশলী ৷
বুধবাৰে দিনৰ প্ৰায় ১০-৩০ বজাত ছবিখনৰ প্ৰচাৰৰ বাবে অহা দলটো শিৱসাগৰত উপস্থিত হৈ নামতি শ্বহীদ পিয়লি ফুকন মহাবিদ্যালয়ত আয়োজিত এক প্ৰচাৰ অনুষ্ঠানত অংশগ্ৰহণ কৰি ছবিখনৰ ইতিবাচক দিশ সমূহৰ ওপৰত মন্তব্য কৰি ছবিখন উপভোগ কৰিবলৈ সকলোকে আহ্বান জনায় ৷ইফালে প্ৰচাৰকাৰী দলটোক কাষত পাই আনন্দত আত্মহাৰা হৈ পৰে মহাবিদ্যালয় খনৰ ছাত্ৰ ছাত্ৰী শিক্ষক সমাজকে ধৰি উপস্থিত সকলো লোক ।
শিৱসাগৰৰ পিছত টিম ৰত্নাকৰ উপস্থিত হয় টীয়কত ৷১১অক্টোবৰত মুক্তি পাবলগীয়া যতীন বৰাৰ "ৰত্নাকৰ"ৰ প্ৰচাৰৰ উদ্দেশ্যেৰে টীয়ক জাতীয় বিদ্যালয়ত দেখা গ'ল "ৰত্নাকৰ"ৰ পৰিয়াল"ক ৷ টীয়ক চিনে ক্লাৱৰ উদ্যোগত আয়োজিত এক অনুষ্ঠানত "ৰত্নাকৰ " পৰিয়াল উপস্থিত হোৱাৰ লগে লগেই হৰ্ষোল্লাসেৰে ভৰি পৰে টীয়ক জাতীয় বিদ্যালয় চৌহদ ।
