আমগুৰি, 13 মে’ : তেজেৰে লুতুৰী পুতুৰী এগৰাকী বয়োজ্যেষ্ঠ মহিলা ৷ কেৱল দৌৰিছে আৰু দৌৰিছে ৷ প্ৰাণৰ মমতাত এক সুৰক্ষিত স্থানৰ সন্ধানত বয়োজ্যেষ্ঠ মহিলাগৰাকীয়ে কেৱল দৌৰিছে ৷
ঘটনাৰ স্থান শিৱসাগৰৰ গৌৰীসাগৰ আৰক্ষী থানাৰ অন্তৰ্গত নখনা খনিকৰ গাঁও ৷ জন্মদাত্ৰী মাতৃক প্ৰাণে মৰাৰ চেষ্টা পাষাণ পুত্ৰৰ (Attempt to murder case in Sivsagar) ৷ ভুক্তভোগী মহিলাগৰাকী হৈছে ৰীণা খনিকৰ ৷ ৰীণা খনিকৰে অভিযোগ কৰা অনুসৰি, বৃহস্পতিবাৰে তেওঁৰ কনিষ্ঠ পুত্ৰ বিজু খনিকৰে (35) তেওঁক প্ৰাণে মৰাৰ চেষ্টা কৰে ৷
কনিষ্ঠ পুত্ৰ বিজু খনিকৰৰ চোকা অস্ত্ৰৰ আঘাতৰ ফলত গুৰুত্বৰভাৱে আহত হয় মাতৃ ৰীণা খনিকৰ ৷
পৰৱৰ্তী সময়ত চেগ বুজি ঘৰৰ পৰা পলায়ন কৰে ভুক্তভোগী ৰীণা খনিকৰে আৰু তেজেৰে লুতুৰী-পুতুৰী অৱস্থাত উপস্থিত হয়গৈ গৌৰীসাগৰ আৰক্ষী থানাত ৷ গৌৰীসাগৰ আৰক্ষীয়ে মহিলাগৰাকীৰ এনে অৱস্থা দেখি ততাতৈয়াকৈ প্ৰাথমিক চিকিৎসা প্ৰদান কৰাৰ পাচত মহিলাগৰাকীক উন্নত চিকিৎসাৰ বাবে শিৱসাগৰ অসামৰিক চিকিৎসালয়লৈ প্ৰেৰণ কৰে ৷
জন্মদাত্ৰী মাতৃক প্ৰাণে মৰাৰ চেষ্টা পাষাণ পুত্ৰৰ লগতে পঢ়ক :মতানৈক্যৰ বাবেই দাৰে ঘপিয়ালে মাতৃ-ভগ্নীক
ইফালে ভুক্তভোগী মহিলাগৰাকীৰ অভিযোগ অনুসৰি, দৈনিক মদ্যপান কৰি তেওঁৰ পুত্ৰই প্ৰায়েই ঘৰত অশান্তিৰ পৰিৱেশ সৃষ্টি কৰি আহিছে । অন্য দিনাৰ দৰে বৃহস্পতিবাৰেও অত্যাধিক মদ্যপান কৰি বিজু খনিকৰে সৃষ্টি কৰিছিল এক হুলস্থূলীয়া পৰিৱেশৰ ৷ উপায়ন্তৰ হৈ পৰৱৰ্তী সময়ত ৰীণা খনিকৰে পুত্ৰক বাধা দিয়ে ৷
কিন্তু মাতৃৰ বাধা নামানি বিজু খনিকৰে চোকা অস্ত্ৰৰে আঘাত কৰে ৰীণা খনিকৰে । পুত্ৰৰ চোকা অস্ত্ৰৰ আঘাতত গুৰুত্বৰভাৱে আহত হয় ৰীণা খনিকৰ ৷ পৰৱৰ্তী সময়ত গৌৰীসাগৰ আৰক্ষীয়ে মাতৃক আক্ৰমণ কৰা কুলাংগাৰ পুত্ৰক আটক কৰিবলৈ ঘটনাস্থলীত উপস্থিত হয় ৷
কিন্তু ঘটনাস্থলীৰ পৰা পলায়ন কৰে অভিযুক্ত পুত্ৰ বিজু খনিকৰে ৷ তথ্য অনুসৰি, বাতৰি লিখা পৰলৈকে গৌৰীসাগৰ আৰক্ষীয়ে আটক কৰিবলৈ সক্ষম হোৱা নাই অভিযুক্ত বিজু খনিকৰক ৷ এই ঘটনাক কেন্দ্ৰ কৰি অঞ্চলটোত এক চাঞ্চল্যই বিৰাজ কৰে ৷
লগতে পঢ়ক :Sensational murder at Rangapara: পুত্ৰৰ হাতত প্ৰাণ গ'ল দুৰ্ভগীয়া মাতৃৰ
