মৰাণ, 8 অক্টোবৰ :600 বছৰীয়া আহোম ৰাজত্ব কালৰ প্ৰথম ৰাজধানী ঐতিহাসিক চৰাইদেউ মৈদামস্থলী বিশ্ব ঐতিহ্যক্ষেত্ৰত অন্তৰ্ভুক্তিৰ বাবে ইউনেস্কোৰ বিশেষজ্ঞ প্ৰতিনিধি লিম চিং চিয়াঙে চৰাইদেউ মৈদামস্থলী পৰ্যবেক্ষণৰ বাবে শনিবাৰে বিয়লি চৰাইদেউ মৈদামস্থলীত উপস্থিত হয় ৷ চৰাইদেউ মৈদামস্থলীত স্থাপন কৰা ৰেণচেঙত মলুংসকলে অনুষ্ঠিত কৰা ফুৰালুং পূজাত অংশগ্ৰহণ কৰি সন্ধিয়া মৈদামক্ষেত্ৰৰ কিছু ঠাই ভ্ৰমণ কৰিছিল বিশেষজ্ঞগৰাকীয়ে । ইয়াৰ পাচতেই দেওবাৰে পুৱাই ভাৰতৰ পুৰাতত্ত্ব বিভাগৰ বিষয়াসকলক লগত লৈ ইউনেস্কোৰ বিশেষজ্ঞ প্ৰতিনিধি লিম চিং চিয়াঙে চৰাইদেউ মৈদাম পৰিদৰ্শন কৰা বাবে উপস্থিত হয়।
মৈদামত উপস্থিত হৈ কেন্দ্ৰীয় আৰু ৰাজ্যিক পুৰাতত্ব বিভাগৰ পৰা যাৱতীয় তথ্য সংগ্ৰহ কৰিছে পৰ্যবেক্ষকগৰাকীয়ে । পুৰাতাত্বিক খননকাৰ্য চলি থকা মৈদামৰ অভ্যন্তৰত প্ৰৱেশ কৰি বিভিন্ন তথ্য সংগ্ৰহ কৰিছে পৰ্যবেক্ষকগৰাকীয়ে। আনকি ইউনেস্কোৰ পৰ্যবেক্ষকগৰাকীয়ে মৈদামক্ষেত্ৰৰ প্ৰতিটো ঐতিহাসিক সমল পৰ্যবেক্ষণ কৰিছে।
দলটোৱে নিজৰ ফোন আৰু কেমেৰাৰ লেন্সত বন্দী কৰিছে মৈদামৰ ঐতিহাসিক সমল সমূহৰ দৃশ্য । কেন্দ্ৰীয় আৰু ৰাজ্যিক পুৰাতত্ব বিভাগৰ দায়িত্বত থকা বিষয়াসকলে সহযোগিতা আগবঢ়াই বিষয়াগৰাকীক । ইউনেস্কোৰ পৰ্যবেক্ষকগৰাকীয়ে সোমবাৰলৈকে চৰাইদেউ মৈদাম ক্ষেত্ৰত থাকিব বুলি জানিব পৰা গৈছে । এই সময়ছোৱাত সাধাৰণ পৰ্যটকৰ বাবে বন্ধ থাকিব চৰাইদেউ মৈদাম।