আৰক্ষী অধীক্ষকৰ অমানৱীয় বিচাৰ : মৃত্যুক সাৱটিলে কনিষ্টবলে

আৰক্ষী অধীক্ষকৰ শাস্তি মূৰ পাতি লৈ মৃত্যুক সাৱটিলে এজন আৰক্ষী কনিষ্টবলে ৷ সামান্য কথাতে গুৰু শাস্তি দিয়া হ'ল পৰমানন্দ য়েইনক ৷

শিৱসাগৰ, আগষ্ট 28 : শিৱসাগৰ জিলাৰ জয়সাগৰত মৰ্মান্তিক ঘটনা ৷ আৰক্ষী অধীক্ষকৰ শাস্তি মূৰ পাতি লৈ মৃত্যুক সাৱটিলে এজন আৰক্ষী কনিষ্টবলে ৷

কিছুদিন পূৰ্বে এটা সংগঠনৰ কেইজনমান সদস্যই এজাহাৰ দাখিল কৰিবলৈ আহিছিল জয়সাগৰ থানালৈ ৷ দাখিলৰ পূৰ্বে এজাহাৰখন ম'বাইলেৰে ফটো উঠাব খুজিছিল সদস্যকেইজনে ৷ নীতি বৰ্হিঃভূত এই কাৰ্যক বাধা দিবলৈ গৈ সংগঠনৰ সদস্যৰ ৰোষত পৰে জয়সাগৰ আৰক্ষী চকীৰ কনিষ্টবল পৰমানন্দ য়েইন ৷ কনিষ্টবলজনৰ বিৰুদ্ধে আৰক্ষী অধীক্ষকক অভিযোগ দিলে সংগঠনৰ সদস্যসকলে ৷ তাৰ পাচতেই অধীক্ষক অমিতাভ সিন্হাই শাস্তিমূলক ব্যৱস্থা গ্ৰহণ কৰে 50 বছৰীয়া পৰমানন্দ য়েইনৰ বিৰুদ্ধে ৷ শাৰীৰিকভাৱে অসুস্থ কনিষ্টবলগৰাকীক চিকিৎসালয়ত ভৰ্তি কৰোৱা হয় যদিও মৃত্যুক আঁকোৱালি লয় পৰমানন্দ য়েইনে ৷