সুশান্ত বৰগোঁহায়েই হ'ব থাওৰা সমষ্টিত বিজেপিৰ প্ৰাৰ্থী

সুশান্ত বৰগোঁহায়ে হ'ব থাওৰা সমষ্টিত বিজেপিৰ প্ৰাৰ্থী ৷ থাওৰাত উপস্থিত হৈ মন্ত্ৰী পীযুষ হাজৰিকাই কৰিলে এই ঘোষণা ৷

মৰাণ, 13 ছেপ্টেম্বৰ :কংগ্ৰেছ মুক্ত অসম গঢ়ি তোলাৰ বাবে আপ্ৰাণ চেষ্টা চলাইছে শাসক দল বিজেপিয়ে । থাওৰাৰ কংগ্ৰেছ বিধায়ক সুশান্ত বৰগোঁহাইক বিজেপিত যোগদান কৰোৱাই পুনৰ বিজেপি প্ৰাৰ্থী দিয়াটো নিশ্চিত কৰিছে বিজেপিয়ে । প্ৰথম অৱস্থাত সুশান্ত বৰগোঁহাইক বিজেপি দলৰ প্ৰাৰ্থীত্ব দিয়াৰ ক্ষেত্ৰত থাওৰাৰ প্ৰাক্তন বিধায়ক কুশল দুৱৰীৰ লগতে বিজেপি কৰ্মী সকলে বিৰোধিতা কৰিছিল যদিও অৱশেষত নিশ্চিত হ'ল থাওৰা সমষ্টিৰ উপ-নিবাৰ্চনৰ বিজেপি দলৰ প্ৰাৰ্থী হ'ব সুশান্ত বৰগোঁহাই ।

থাওৰাৰ এক সভাত অংশগ্ৰহণ কৰিবলৈ গৈ কাষত প্ৰাক্তন বিজেপি বিধায়ক কুশল দুৱৰীক লৈ বিজেপি দলৰ প্ৰতাপী মন্ত্ৰী পীযুষ হাজৰিকাই ঘোষণা কৰিলে যে থাওৰা সমষ্টিত বিজেপি দলৰ প্ৰাৰ্থী হ'ব সুশান্ত বৰগোঁহাই । মন্ত্ৰী পীযুষ হাজৰিকাই কয় যে, সুশান্ত বৰগোঁহাইক প্ৰাৰ্থিত্ব দিয়াৰ ক্ষেত্ৰত কুশল দুৱৰীৰ এতিয়া কোনো ধৰণৰ বিৰোধিতা নাই ।

তেওঁ নিজৰ ৰাজনৈতিক ভবিষ্যতৰ বিষয়ত মুখ্যমন্ত্ৰী আৰু ৰাজ্যিক নেতৃত্বৰ লগত ইতিমধ্যে আলোচনা কৰিছে বুলিও কয় মন্ত্ৰী হাজৰিকাই । সুশান্ত বৰগোঁহাই আৰু কুশল দুৱৰী এক হৈ এইবাৰ থাওৰাত ভোটৰ ক্ষেত্ৰত ৰেকৰ্ড কৰিব বুলিও কয় মন্ত্ৰী পীযুষ হাজৰিকাই ।

ইফালে, শেহতীয়াকৈ সুশান্ত বৰগোঁহায়েও কুশল দুৱৰীৰ সৈতে একে লগে কাম কৰি পূৰ্বতকৈ বহুত বেছি ভোট পোৱাৰ সম্ভাৱনীয়তা প্ৰকাশ কৰিছে ৷ সাংবাদিকৰ আগত মুখামুখি হৈ টিকট প্ৰত্যাশী সুশান্ত বৰগোঁহায়ে বিধায়ক অখিল গগৈকো সমালোচনা কৰি কয় যে, থাওৰাত ৰাইজৰ দল কেতিয়াও ফেক্টৰ হ’ব নোৱাৰে । অখিল গগৈয়ে নিৰ্দলীয় বিধায়ক হৈও অসমৰ মুখ্যমন্ত্ৰী হ’ব বিচাৰে ৷
লগতে পঢ়ক :গুৱাহাটী উচ্চ ন্যায়ালয়ত স্থায়ী ন্যায়াধীশ নিযুক্তিৰ প্ৰস্তাৱত অনুমোদন