শিৱসাগৰ চক্ৰ বিষয়াৰ কাৰ্যালয়ত বিশেষ ভূমি ৰাজহ শিবিৰ

শিৱসাগৰ ৰাজহ চক্ৰ বিষয়াৰ তৎপৰতাত আৰু জিলা প্ৰশাসনৰ উদ্যোগত চলিত ৰাজহ বৰ্ষত অনাদায় ভূমি ৰাজহ সংগ্ৰহৰ বাবে এই শিবিৰ অনুষ্ঠিত কৰা হয় ৷

শিৱসাগৰ, 20 মে':শিৱসাগৰ চক্ৰ বিষয়াৰ কাৰ্যালয়ত সোমবাৰে এক বিশেষ ভূমি ৰাজহ শিবিৰ অনুষ্ঠিত হয় ৷ শিৱসাগৰ ৰাজহ চক্ৰ বিষয়াৰ তৎপৰতাত আৰু জিলা প্ৰশাসনৰ উদ্যোগত চলিত ৰাজহ বৰ্ষত অনাদায় ভূমি ৰাজহ সংগ্ৰহৰ বাবে এই শিবিৰ অনুষ্ঠিত কৰা হয় ৷

বিগত 10 বছৰ ধৰি যি সকল লোকে ভূমি ৰাজহ প্ৰদান কৰা নাই সেই সকলক চৰকাৰী জাননী প্ৰেৰণ কৰি,আজি অনুষ্ঠিত ৰাজহ শিবিৰত ৰাজহ প্ৰদানৰ এক বিশেষ সুবিধা প্ৰদান কৰা হয় ৷ ইয়াৰ লগতে বিভিন্ন ভূমি বিবাদ অথবা বন্দোবস্তিৰ আবেদন গ্ৰহণৰ এক ৰাজহুৱা ব্যৱস্থাও কৰা হয় যাতে ভূমি বিষয়ক সমস্যা নিস্পত্তিৰ বাবে ৰাইজে আবেদন কৰিব পাৰে ৷ উল্লেখ্য যে শিৱসাগৰ ৰাজহ চক্ৰৰ পাঁচ মৌজাৰ সহস্ৰাধিক লোকে আজি আনুষ্ঠিত এই শিবিৰত অংশ গ্ৰহণ কৰি ৰাজহ আদায়ৰ লগতে আন বিষয় নিস্পত্তিৰ শিতানত চক্ৰ বিষয়াৰ কাৰ্যালয়ে আগবঢ়োৱা সুবিধাৰ গ্ৰহণ কৰে ৷