চালকে ম'বাইলত কথা পাতি থকাৰ বাবেই সংঘটিত হৈছিল ডিমৌৰ শোকাৱহ ট্ৰেভেলাৰ দূৰ্ঘটনা !

মুখ্য়মন্ত্ৰীৰ নিৰ্দেশত শিৱসাগৰৰ ডিমৌত সংঘটিত দুৰ্ঘটনাৰ তদন্ত আৰম্ভ পৰিবহণ আয়ুক্ত বীৰেন্দ্ৰ মিট্টালৰ

শিৱসাগৰ, 24 ছেপ্টেম্বৰ :শিৱসাগৰৰ ডিমৌত সংঘটিত ভয়াবহ দুৰ্ঘটনাৰ তদন্ত আৰম্ভ কৰিলে পৰিবহণ আয়ুক্ত বীৰেন্দ্ৰ মিট্টালে ৷ সোমবাৰে পুৱা শিৱসাগৰৰ ডিমৌ থাওৰা বাগানত সংঘটিত ভয়াবহ পথ দুৰ্ঘটনাত ৯ জন লোকৰ মৃত্যু হোৱাৰ বিপৰীতে ১৩ জন লোক গুৰুতৰ ভাৱে আহত হৈছিল ৷ থাওৰা দলৰ সমীপত গোলাঘাটৰ পৰা ডিব্ৰুগড় অভিমুখী এখন আলট্ৰা বাছ আৰু তিনিচুকীয়াৰ পৰা যোৰহাট অভিমুখী এখন ট্ৰেভেলাৰৰ মাজত মুখামুখি সংঘৰ্ষৰ ফলত সংঘটিত হৈছিল এই ভয়াবহ পথ দুৰ্ঘটনা । এই ঘটনাৰ পাছতে মুখ্যমন্ত্ৰী সৰ্বানন্দ সোণোৱালে ঘটনাৰ তদন্তৰ নিৰ্দেশ দিছিল পৰিবহণ আয়ুক্ত বীৰেন্দ্ৰ মিট্টালক ।

সেইসূত্ৰে আয়ুক্ত বীৰেন্দ্ৰ মিট্টালে শিৱসাগৰ জিলাৰ উপায়ুক্ত ড' লক্ষ্মণন এছ আৰু শিৱসাগৰ জিলাৰ আৰক্ষী অধীক্ষক অমিতাভ সিন্হাৰ সৈতে ডিমৌত উপস্থিত হৈ ঘটনাৰ বুজ লোৱাৰ লগতে পৰিস্থিতি পৰ্যৱেক্ষণ কৰে ৷ দুৰ্ঘটনাৰ পৰা ৰক্ষা পৰা লোকৰ সৈতে মিলিত হৈ আয়ুক্ত গৰাকীয়ে ঘটনাৰ কাৰণ সন্দৰ্ভত অনুসন্ধান আৰম্ভ কৰে । অতি সোনকালে অনুসন্ধানৰ প্ৰতিবেদন দাখিল কৰিবলগীয়া আয়ুক্ত গৰাকীয়ে কয় যে, সোমবাৰৰ দুৰ্ঘটনা প্ৰতিকুল বতৰ, অত্যাধিক গতি আৰু চালকে মবাইলত কথা পাতি যোৱাৰ বাবে সংঘটিত হৈছিল বুলি ধাৰণা কৰিছে ৷ বাহন চলোৱাৰ সময়ত মানিবলগীয়া নিয়ম মানি নচলাৰ বাবেই এনে ঘটনা সংঘটিত হয় বুলি আয়ুক্ত জনে উল্লেখ কৰে ৷ লগতে আয়ুক্তজনে কয় যে, যানবাহন আইন পালন আৰু সুস্থ মানবীয় আচৰণে এনে সমূহ বিপৰ্যয় ৰোধ কৰিব পৰা যায় ৷ আনহাতে শিৱসাগৰ জিলা উপায়ুক্তৰ সভাক্ষত বিভিন্ন চৰকাৰী বিভাগ, স্বেচ্ছাসেৱী সংগঠন, মটৰ পৰিবহণ সংস্থা আদিৰ সৈতে মিলিত হৈ পথ দুৰ্ঘটনা কিদৰে ৰোধ কৰিব পাৰি সেই সন্দৰ্ভত বিশদ আলোচনা চলায় আয়ুক্ত গৰাকীয়ে ৷