নিউজ ডেক্স , 1 ডিচেম্বৰঃ নাগৰিকত্ব সংশোধনী বিধেয়কৰ বিৰুদ্ধে ৰাজ্যজুৰি প্ৰতিবাদ অব্যাহত ৰাখিছে সদৌ অসম ছাত্ৰ সন্থাই ৷ দেওবাৰে নলবাৰী জিলাৰ বৰভাগ অঞ্চলত বিধেয়ক বাতিলৰ দাবীত চাইকেল ৰেলী কাৰ্যসূচী ৰূপায়ন কৰে বৰভাগ আঞ্চলিক ছাত্ৰ সন্থাই ৷ ৰণাকুছিস্থিত শ্বহীদ ভৱনৰ পৰা আৰম্ভ হোৱা চাইকেল ৰেলীত শতাধিক আছু সতীৰ্থই অংশগ্ৰহণ কৰি 'কেব'ৰ বিৰুদ্ধে বিভিন্ন শ্লোগান দিয়ে । সমদলৰ আৰম্ভণিতে নলবাৰী জিলা ছাত্ৰ সন্থাৰ সাধাৰণ সম্পাদক সমৰজ্যোতি মহন্তই 'কেব'ক অসাংবিধানিক আৰু খিলঞ্জীয়া বিৰোধী বুলি আখ্যা দিয়ে ৷ কমাৰকুছিত অন্ত পৰা চাইকেল ৰেলীত বৰভাগ আঞ্চলিক ছাত্ৰ সন্থাৰ সভাপতি ব্ৰজেন কলিতাই 'কেব' বাতিল নোহোৱা পৰ্যন্ত এই সংগ্ৰাম চলি থাকিব বুলি উল্লেখ কৰে ।
অনুৰূপ ভাৱে , নাগৰিকত্ব সংশোধনী বিধেয়ক বাতিলৰ দাবীত তিনিচুকীয়া জিলাৰ ধলাতো বৃহৎ মটৰ চাইকেল সমদল বাহিৰ কৰা হয় ৷ ধলা আঞ্চলিক ছাত্ৰ সন্থাৰ উদ্যোগত স্থানীয় আছা, আটছা আৰু সোণোৱাল কছাৰী ছাত্ৰ সন্থাৰ সহযোগত কেইবাশ মটৰ চাইকেলে ধলা তালাপ অঞ্চলৰ বহু গাওঁ পৰিভ্ৰমণ কৰি ৰাইজক সজাগ কৰি তোলাৰ প্ৰয়াস কৰে প্ৰতিবাদকাৰী সকলে ৷ "নাগৰিকত্ব সংশোধনী বিধেয়ক বাতিল কৰক" , "সদৌ অসম ছাত্ৰ সন্থা জিন্দাবাদ" , "বিজেপি চৰকাৰ হুছিয়াৰ" ইত্যাদি শ্লগানেৰে পৰিবেশ উত্তাল কৰি তোলে প্ৰতিবাদকাৰীসকলে ৷ জাতিধ্বংসী বিধেয়ক যিকোনো কাৰণতে মানি নোলোৱাৰ লগতে দৰকাৰ হ'লে দেশৰ স্বাৰ্থত শ্বহীদ হোৱা বীৰ সকলৰ দৰে তেওঁলোকেও শ্বহীদ হ'বলৈ সাজু বুলি প্ৰতিবাদকাৰীসকলে মত পোষণ কৰাৰ লগতে অসম গণ পৰিষদৰ দুমুখীয়া স্থিতিকো তীব্ৰ সমালোচনা কৰে ৷ বৃহৎ মটৰ চাইকেল সমদলটি ধলাৰ পৰা ডাঙৰী, তালাপ, টিপুক হৈ ৰাইজৰ মাজত কেবৰ বিৰুদ্ধে সজাগতা অনাৰ প্ৰয়াস কৰে ৷