যৌতুক বিচাৰি পত্নীক হত্যাৰ চেষ্টা ড্ৰাগছ আসক্ত স্বামীৰ

যৌতুকৰ বাবে ৰাজ্যত পুনৰ সংঘটিত হৈছে নাৰী নিৰ্যাতনৰ ঘটনা । শেহতীয়াকৈ নগাঁও জিলাৰ ৰেংবেঙৰ ছহিদপুৰত পোহৰলৈ আহিছে নাৰী নিৰ্যাতনৰ ঘটনা ৷ য’ত এজন ড্ৰাগছ আসক্ত স্বামীয়ে যৌতুক বিচাৰি পত্নীক আক্ৰমণ কৰে ৷ ইতিমধ্যে ঘটনা সন্দৰ্ভত আৰক্ষীৰ কাষ চাপিছে ভুক্তভোগী মহিলাৰ পৰিয়াল ৷

বঢ়মপুৰ,15 জুন : যৌতুকৰ বাবে ৰাজ্যত পুনৰ সংঘটিত হৈছে নাৰী নিৰ্যাতনৰ ঘটনা । এইবাৰ ড্ৰাগছ আসক্ত স্বামীৰ আক্ৰমণত আহত হ'ল পত্নী । নগাঁও জিলাৰ ৰেংবেঙৰ ছহিদপুৰত সংঘটিত হৈছে এই ঘটনা ।

অভিযোগ অনুসৰি, দৈনিক ড্ৰাগছ সেৱন কৰি আহি স্বামী তাছনুৰ হুছেইনে পত্নীক ধাৰাবাহিকভাৱে যৌতুকৰ নামত শাৰীৰিক আৰু মানসিক অত্যাচাৰ চলাই আহিছিল । তাছনুৰৰ লগতে শাহুৱেক আৰু ননদৰ বিৰুদ্ধেও উঠিছে মহিলাগৰাকীক শাৰীৰিক আৰু মানসিক অত্যাচাৰ চলোৱাৰ অভিযোগ । স্বামীগৃহৰ অত্যাচাৰত পিতৃৰ পৰিয়ালে আ-অলংকাৰ বনাই দিয়াৰ লগতে ধনৰ যোগান ধৰিছিল জোঁৱায়েকক । সোমবাৰে পুনৰ যৌতুকৰ নামত বোৱাৰী গৰাকীক অত্যাচাৰ কৰাৰ লগতে হত্যাৰ চেষ্টা কৰাত পিতৃগৃহৰ লোক কাষ চাপে কঠিয়াতলী আৰক্ষীৰ । পাছত আহত অৱস্থাত নিশা আৰক্ষীয়ে ভুক্তভোগী বোৱাৰী গৰাকীক উদ্ধাৰ কৰি কঠিয়াতলীত স্বাস্থ্য পৰীক্ষা কৰোৱাৰ পিছত উন্নত চিকিৎসাৰ বাবে নগাঁৱলৈ প্ৰেৰণ কৰে ৷

যৌতুক বিচাৰি পত্নীক হত্যাৰ চেষ্টা ড্ৰাগছ আসক্ত স্বামীৰ

ঘটনা সন্দৰ্ভত তাছনুৰৰ লগতে অন্য অভিযুক্ত কেইজনৰ বিৰুদ্ধে কঠিয়াতলী আৰক্ষী চকীত এজাহাৰ দাখিল কৰিছে ভুক্তভোগী বোৱাৰী গৰাকীৰ পৰিয়ালে ৷ এইক্ষেত্ৰত আৰক্ষীয়ে কি ব্যৱস্থা গ্ৰহণ কৰে, সেয়া সময়তহে লক্ষণীয় হ’ব ৷

লগতে পঢ়ক: ত্ৰিপুৰাত 4 নাবালিকাক ধৰ্ষণ: আটক 7 অভিযুক্ত