বঢ়মপুৰ,14ছেপ্তেম্বৰঃ সোমবাৰে পুৱা উদ্ধাৰ কৰা হয় কামপুৰত আৰক্ষীৰ ভয়ত নদীত জাঁপ দি সন্ধানহীন হোৱা চি আই এছ এফৰ জোৱান দেৱাশীষ দাসৰ মৃতদেহ ৷ কামপুৰৰ বগলাজানত জোৱানজনৰ মৃতদেহ উদ্ধাৰ কৰে SDRF আৰু NDRF বাহিনীয়ে ৷ সোমবাৰে নৈত ওপঙি থকা অৱস্থাত মৃতদেহটো প্ৰত্যক্ষ কৰে স্থানীয় লোকে ৷ ইপিনে দেৱাশীষৰ মৃতদেহ উদ্ধাৰৰ পিছতেই এক শোকাকুল পৰিৱেশে বিৰাজ কৰিছে সমগ্ৰ অঞ্চলটোত ৷
উদ্ধাৰ হ'ল CISFৰ জোৱান দেৱাশীষ দাসৰ মৃতদেহ
উল্লেখযোগ্য যে, যোৱা শনিবাৰে নিশা কামপুৰৰ তেতেলিসৰাৰ দেৱাশীষ দাস সহ কেইজনমান যুৱক একগোট হৈ আছিল ৷ তেনে সময়তে কামপুৰ আৰক্ষীৰ তহলদাৰী দল এটা আহি উপস্থিত হোৱাত আৰক্ষীৰ ভয়ত পলায়ন কৰিবলৈ যুৱক কেইজনে জাঁপ দিছিল নিশাৰী নদীত । ইয়াৰ পিছৰে পৰা সন্ধানহীন হৈ আছিল চি আই এছ এফ ত কৰ্মৰত জোৱান দেৱাশীষ দাস ৷ জোৱানজন সন্ধানহীন হোৱাৰ পিছতেই উত্তপ্ত হৈ পৰিছিল সমগ্ৰ অঞ্চলটো ।