কলিয়াবৰ, ২৪ ফেব্ৰুৱাৰী: নগাঁৱৰ কলিয়াবৰত চৰকাৰী অনুদান লাভৰ পৰা বঞ্চিত দৰিদ্ৰ ৰাইজৰ ক্ষোভ । কলিয়াবৰৰ মাজ-পূৱথৰীয়া গাঁও পঞ্চায়তত চৰকাৰী অনুদান প্ৰদানৰ বাবে হিতাধিকাৰী বাছনিত কৰাৰ নামত অনিয়ম সংঘটিত হোৱাৰ অভিযোগ উত্থাপিত হৈছে । কলিয়াবৰৰ মহকুমা কল্যাণ বিষয়াৰ কাৰ্যালয়ৰ পৰা অনুসূচিত জাতিৰ দৰিদ্ৰ পৰিয়ালৰ বাবে বিভিন্ন সামগ্ৰী আবণ্টিত হৈছে । কিন্তু এই সামগ্ৰী বিতৰণত দুৰ্নীতি সংঘটিত হোৱাৰ অভিযোগ তুলিছে স্থানীয় ৰাইজে ।
চৰকাৰী অনুদানৰ টিনপাত, ফিল্টাৰ, চিলাই মেছিনকে ধৰি বিভিন্ন সামগ্ৰী বিতৰণৰ ক্ষেত্ৰত হিতাধিকাৰী বাছনি কৰাক লৈ মুঠেও সন্তুষ্ট নহয় একাংশ লোক । তেওঁলোকৰ মতে, একেটা পৰিয়ালতে ৩-৪জনকৈ লোকে চৰকাৰী সাহায্য লাভ কৰিছে । ইয়াৰ ফলত প্ৰকৃত হিতাধিকাৰী বাদ পৰি ৰৈছে বুলি অভিযোগ উত্থাপন কৰিছে স্থানীয় লোকসকলে । অনুসূচিত জাতি উন্নয়ন পৰিষদৰ জিলা সমিতিৰ সদস্য কৃষ্ণৰাম হাজৰিকাই চৰকাৰী সাহায্য বিতৰণৰ ক্ষেত্ৰত প্ৰকৃত হিতাধিকাৰীক বঞ্চিত কৰি ৫০০ ৰ পৰা ১০০০ টকাকৈ উপঢৌকন লৈ হিতাধিকাৰী বাছনি কৰাৰ গুৰুতৰ অভিযোগ তোলা হৈছে ।