দেশৰ বাঘ সংৰক্ষণৰ প্ৰচেষ্টাক জনমুখী কৰাৰ উদ্দেশ‍্যে বিশেষ ৰেলী

দেশৰ বাঘ সংৰক্ষণৰ গৌৰৱোজ্জ্বল পদক্ষেপক ৰাইজৰ মাজলৈ নিয়াৰ প্ৰচেষ্টাৰে আৰম্ভ হৈছে 'ইণ্ডিয়া ফৰ টাইগাৰ, এ ৰেলী অন হুইল' শীৰ্ষক এক বিশেষ ৰেলী ৷ উত্তৰ-পূৱ ভাৰতৰ মুঠ আঠখন ব‍াঘ্ৰ প্ৰকল্পৰ পৰা আৰম্ভ হোৱা ৰেলী মানহত গৈ সামৰণি পৰিব ৷

কলিয়াবৰ,2 অক্টোবৰ: 2020 বৰ্ষত দেশৰ স্বাধীনতাৰ পয়সত্তৰ বছৰ সম্পূৰ্ণ হোৱা উপলক্ষে দেশে বছৰ যোৰা 'আজাদী কা অমৃত মহোৎসৱ' নামৰ এক কাৰ্য‍সূচী ৰূপায়ণ কৰা পৰিকল্পনা হাতত লৈছে ৷ সেই কাৰ্য‍সূচীৰ অন্তৰ্গত দেশৰ ৰাষ্ট্ৰীয় ব‍াঘ্ৰ সুৰক্ষা প্ৰাধিকৰণৰ উদ্যোগত শনিবাৰে কাজিৰঙা ৰাষ্ট্ৰীয় উদ্যানৰ কঁহৰাত আনুষ্ঠানিকভাৱে শুভাৰম্ভণি কৰা হয় 'ইণ্ডিয়া ফৰ টাইগাৰ এ ৰেলী অন হুইল' নামৰ এক সজাগতা ৰেলীৰ ৷

স্বাধীনতাৰ পৰৱৰ্তী কালৰ 9 খন বাঘ্ৰ প্ৰকল্পৰ পৰা বৰ্তমানলৈ হৈ উঠা 51 খন বাঘ্ৰ প্ৰকল্পৰ সুৰক্ষাৰ বাবে 'ইণ্ডিয়া ফৰ টাইগাৰ, এ ৰেলী অন হুইল'ৰ এই সজাগতা অভিযান অন্ত পৰিব 1973 চনত স্থাপিত হোৱা মানাহ ৰাষ্ট্ৰীয় উদ্যান আৰু বাঘ্ৰ প্ৰকল্পত ৷ উত্তৰ-পূৱ ভাৰতৰ মুঠ আঠখন ব‍াঘ্ৰ প্ৰকল্পক সামৰি আৰম্ভ হোৱা এই ৰেলীৰ সামৰণি পৰিব মানাহ ৰাষ্ট্ৰীয় উদ্যানত ৷

কাজিৰঙা ৰাষ্ট্ৰীয় উদ্যানৰ পৰা আৰম্ভ হোৱা ৰেলীত অংশ লোৱা দলটোৱে শনিবাৰে বুঢ়াপাহাৰ বনাঞ্চলৰ অন্তৰ্গত নতুন ডাংগাৰৰ চ'ৰান এহেমত হৈ ওৰাং ৰাষ্ট্ৰীয় উদ্যানলৈ যাত্ৰা কৰে ৷ এই যাত্ৰাত মিজোৰামৰ ডাম্পা বাঘ্ৰ প্ৰকল্পৰ পৰা অহা দলটোৰে একেলগ হৈ দেওবাৰে পাবগৈ মানাহ ৰাষ্ট্ৰীয় উদ্যান ৷

উল্লেখযোগ্য যে, দেশত 2018 চনৰ পিয়ল মতে 2,968 টা বাঘ আছে ৷ স্বাধীনতাৰ পাছৰে পৰা দেশে বাঘ সংৰক্ষণৰ ক্ষেত্ৰত লোৱা যুগান্তকাৰী পদক্ষেপক ৰাইজৰ মাজলৈ লৈ যোৱাৰ ক্ষেত্ৰত এই 'ইণ্ডিয়া ফৰ টাইগাৰ, এ ৰেলী অন হুইল' এক গুৰুত্বপূৰ্ণ কাৰ্যসূচী বুলি অৱগত কৰে কাজিৰঙা বন সংমণ্ডল বিষয়া গৰাকীয়ে ৷

লগতে পঢ়কঃশোণিতপুৰ ঠেলামৰাৰ চক্ৰ বিষয়া বৰেণ্য ৰঞ্জন বৰঠাকুৰক গ্ৰেপ্তাৰ