নগাঁও, 3 জুন : ড৹ হিমন্ত বিশ্ব শৰ্মা নেতৃত্বাধীন মন্ত্ৰীসকলক জিলা ভিত্তিত অভিভাৱকৰ দায়িত্ব অৰ্পণ কৰিছে । নগাঁও জিলাৰ অভিভাৱক মন্ত্ৰীৰ দায়িত্ব লাভ কৰাৰ পাচত প্ৰথমবাৰৰ বাবে জিলা প্ৰশাসনৰ সৈতে বৈঠকত মিলিত হয় মন্ত্ৰী পীযুষ হাজৰিকা । বৃহস্পতিবাৰে নগাঁও জিলা উপায়ুক্তৰ সভাকক্ষত জিলাখনৰ বিধায়কসকলৰ লগতে প্ৰশাসনৰ মুৰব্বীৰ সৈতে অনুষ্ঠিত বৈঠকত অংশগ্ৰহণ কৰে জলসম্পদ বিভাগৰ মন্ত্ৰী পীযুষ হাজৰিকাই ।
বৈঠকত ক'ভিড ১৯ নিয়ন্ত্ৰণ, সমাগত বানৰ সৈতে মোকাবিলা কৰা, মথাউৰি মেৰামতি, আইন শৃংখলা আদি বিষয়ত আলোচনা কৰা হয় । লগতে গ্ৰামোন্নয়নৰ কাম কাজৰ ওপৰতো সভাত আলোচনা কৰা হয় বুলি সাংবাদিকক জানিবলৈ দিয়ে মন্ত্ৰী হাজৰিকাই । সাংবাদিকৰ আগত মন্ত্ৰী হাজৰিকাই কয়, গ্ৰামাঞ্চলৰ উন্নয়ন সম্ভৱ নহ'লে ৰাজ্যখনৰ সামগ্ৰিক উন্নয়ন নহয় । ৰহাৰ পৰা চাপৰমুখলৈ যোৱা পথত হোৱা গৰাখহনীয়াৰ স্থায়ী সমাধান কৰাৰ কথাও সংবাদ মাধ্যমৰ আগত উল্লেখ কৰে জলসম্পদ বিভাগৰ মন্ত্ৰী পীযুষ হাজৰিকাই ।