কলিয়াবৰ, ২৫ জানুৱাৰী: কলিয়াবৰ ব্লক কংগ্ৰেছ আৰু পশ্চিম কলিয়াবৰৰ ব্লক কমিটিৰ উদ্যোগত ৰাজ্যৰ প্ৰাক্তন মুখ্যমন্ত্ৰী প্ৰয়াত তৰুণ গগৈ দেৱৰ চিতাভস্ম বিসৰ্জন কৰা হয় । কলিয়াবৰৰ শিলঘাটৰ মহাবাহুত বিসৰ্জন দিয়া হয় গগৈৰ চিতাভস্ম ।
দুদিনীয়া কাৰ্যসূচীৰে কলিয়াবৰৰ ভিন্ন স্থানত জনপ্ৰিয় নেতাগৰাকীক শ্ৰদ্ধাঞ্জলি দিয়াৰ অন্তত সোমবাৰে বিয়লি শিলঘাটৰ ব্ৰহ্মপুত্ৰৰ পাৰত পূজা-অৰ্চনা কৰি সম্পূৰ্ণ ধৰ্মীয় ৰীতি-নীতিৰে বিসৰ্জন দিয়া হয় গগৈৰ চিতাভস্ম ।
এই অনুষ্ঠানত উপস্থিত থাকে কলিয়াবৰ ব্লক কংগ্ৰেছ আৰু পশ্চিম কলিয়াবৰৰ ব্লক কমিটিৰ কেইবাজনো সদস্য । লুইতৰ পাৰত গগৈৰ চিতাভস্মত শেষ শ্ৰদ্ধাঞ্জলি জনায় কংগ্ৰেছ কৰ্মীসকলৰ লগতে অলেখ গুণমুগ্ধই ।
উল্লেখ্যে যে, প্ৰয়াত প্ৰাক্তন মুখ্যমন্ত্ৰী তৰুণ গগৈ দেৱৰ স্মৃতিত কংগ্ৰেছৰ উদ্যোগত সম্ভাৱনা যাত্ৰাৰে চিতাভস্ম বিসৰ্জন কাৰ্যসূচী ৰাজ্যৰ প্ৰতিখন জিলালৈ কঢ়িয়াই নি শ্ৰদ্ধাঞ্জলি জনোৱাৰ এক কাৰ্যসূচী হাতত লোৱা হৈছে ।
লগতে পঢ়ক : কয়লাখনিত মৃত্যু হোৱা শ্ৰমিকৰ বাসগৃহত উপস্থিত ছিদ্দিক আহমেদ