নগাঁও, 20 মাৰ্চ: ৰাজ্যত অব্যাহত আছে ড্ৰাগছৰ সৰবৰাহ । হিমন্ত বিশ্ব শৰ্মাৰ চৰকাৰখনে শাসনলৈ আহিয়েই ড্ৰাগছ আৰু ড্ৰাগছ সৰবৰাহকাৰীৰ বিৰুদ্ধে যি হুংকাৰ দিছিল তাক ওফৰাই এতিয়াও ড্ৰাগছৰ ব্যৱসায় অব্যাহত ৰাখিছে একাংশ দুষ্টচক্ৰই ৷ পিছে হাত সাৱটি বহি থকা নাই আৰক্ষীও ৷ দৈনিক অভিযান চলাই আৰক্ষীয়ে জালত পেলাইছে ড্ৰাগছ সৰবৰাহকাৰী ৷
আৰক্ষীৰ অভিযান কালত ৰাজ্যৰ বিভিন্ন স্থানত প্ৰায় নিতৌ ড্ৰাগছ জব্দ হৈছে । আটক হৈছে সৰবৰাহকাৰী । শেহতীয়াকৈ কলিয়াবৰৰ জখলাবন্ধা এন আৰ এল পেট্ৰ'ল পাম্পৰ সমীপত এজন ড্ৰাগছ সৰবৰাহকাৰীক আটক কৰে আৰক্ষীয়ে (Nagaon police detained drugs paddler) । আটকাধীন ব্যক্তিজন চিকনি বৰহোলাৰ জামিৰ আলী (২৭) বুলি জানিব পৰা গৈছে । আটকাধীন অভিযুক্ত ব্যক্তিজনৰ হাতৰ পৰা ০.৫২ গ্ৰাম হেৰ’ইন থকা ৬ টা প্লাষ্টিকৰ কন্টেইনাৰ জব্দ কৰে আৰক্ষীয়ে । অভিযুক্ত ব্যক্তিজনৰ হাতৰ পৰা নম্বৰ প্লেট নথকা এখন ৰঙা ৰঙৰ ছুপাৰ স্প্লেণ্ডাৰ মটৰ চাইকেলো আৰক্ষীয়ে জব্দ কৰে ।
নগাঁৱত মাত্ৰাধিক হাৰত বৃদ্ধি হৈছে ড্ৰাগছৰ সৰবৰাহ । দিনক দিনে ড্ৰাগছৰ ঘাটিত পৰিণত হৈছে নগাঁও (Assam Nagaon drugs news)। নগাঁৱত শেহতীয়াকৈ বৃদ্ধি পোৱা ড্ৰাগছৰ বেহাক লৈ উদ্বিগ্ন হৈ পৰিছে সচেতন মহল । এইবাৰ নগাঁৱত ড্ৰাগছৰ বেহাত জড়িত হৈ পৰিছে খোদ চি আৰ পি এফৰ জোৱান । ড্ৰাগছ বিৰোধী অভিযানত পোহৰলৈ আহিছে এক চাঞ্চ্যলকৰ তথ্য ৷