নগাঁও, 10 অক্টোবৰ:প্ৰয়াত চিত্ৰশিল্পী মুকুট চন্দ্ৰ ভূঞাৰ 85 সংখ্যক জন্মদিন পালন ৷ নগাঁও প্ৰেছ ক্লাৱত মুকুট চন্দ্ৰ ভূঞাৰ জন্মদিন উপলক্ষে সোমবাৰে স্মৃতিচাৰণ সভা অনুষ্ঠিত হয় । নগাঁৱৰ বহু বিশিষ্ট ব্যক্তিৰ উপস্থিতি আছিল উক্ত সভাত ৷ সভাত সভাপতিত্ব কৰে দ্বীজেন্দ্ৰ নাথ হাজৰিকাই। ইফালে সভাৰ পূৰ্বে প্ৰয়াত মুকুট চন্দ্ৰ ভূঞাৰ প্ৰতিচ্ছবিত বন্তি প্ৰজ্বলন কৰে দিলীপ হাজৰিকাই ।
সভাত আদৰণি ভাষণ প্ৰদান কৰে বিশিষ্ট কবি ডাঃ প্ৰয়াগ শইকীয়াই । ভাষণত ডাঃ শইকীয়াই কয় যে, মুকুট চন্দ্ৰ ভূঞাৰ মৃত্যু হোৱা নাই । যিদিনা মোৰ চকু জাপ খাব সেই দিনাহে মুকুট চন্দ্ৰ ভূঞা মোৰ কাষৰ পৰা হেৰাই যাব । ইফালে স্মৃতিচাৰণ সভাত অংশগ্ৰহণ কৰে বিশিষ্ট ছবি পৰিচালক পাৰ্থজিত বৰুৱাই ।
মুকুট চন্দ্ৰ ভূঞাক এজোপা গছৰ সৈতেও তুলনা কৰে ছবি পৰিচালক পাৰ্থজিত বৰুৱাই কয় যে, এজোপা বৰগছৰ দৰে হৈ পৰা মুকুট চন্দ্ৰ ভূঞাৰ ঘৰখন আছিল বহুতৰে আশ্ৰয়স্থল । সেই ঘৰখনৰ এটা কোঠা মুকুট চন্দ্ৰ ভূঞাৰ নামত পূৰ্বৰ দৰেই আশ্ৰয়স্থল হিচাপে গঢ়ি দিবলৈ পৰিয়াললৈ আহ্বান পাৰ্থজিত বৰুৱাৰ । তেওঁ মুকুট চন্দ্ৰ ভূঞাৰ ওপৰত নিৰ্মাণ কৰা 'কিয়ৰস্কুৰ' নামৰ তথ্যচিত্ৰখনৰ বিষয়ে উল্লেখ কৰে ।