মৰিগাঁৱত মজিয়াত বিচনা পাৰি চিকিৎসা ৰোগীক

চিকিৎসা সেৱাৰ বাবে পানীফালি মৰিগাঁও অসামৰিক চিকিৎসালয়লৈ আহে যদিও এখন বিচনাৰ কাৰণে হাহাকাৰ কৰিবলগীয়া হৈছে ৰোগীয়ে

মৰিগাঁও, 25 ছেপ্টেম্বৰঃ মৰিগাঁও অসামৰিক চিকিৎসালয়ত ৰোগীৰ হাহাকাৰ ৷ ৰাজ্যিক স্বাস্থ্য মন্ত্ৰী পীয়ূষ হাজৰিকাৰ গৃহ জিলাৰ একমাত্ৰ চিকিৎসালয়খনত চিকিৎসা গ্ৰহণৰ বাবে নাই বিচনা ৷ যাৰ বাবে মজিয়াত বিচনা পাৰি চিকিৎসা গ্ৰহণ কৰিবলগীয়া হৈছে মৰিগাঁৱৰ বানাক্ৰান্ত ৰোগীয়ে ৷ উল্লেখ্য যে,ৰাজ্যত ভদীয়া বানৰ তাণ্ডৱলীলা অব্যাহত থকাৰ সময়তে মৰিগাঁৱৰ নদীকাষৰীয়া লাহৰীঘাট,ভূৰাগাঁও,মায়ং ৰাজহচক্ৰ তিনিটাত বানপানীৰ সমান্তৰাল ভাৱে জ্বৰ,মূৰৰ বিষ আৰু গ্ৰহণীৰোগত আক্ৰান্ত হৈছে বানাক্ৰান্ত ৰাইজ। চিকিৎসা সেৱাৰ বাবে পানীফালি মৰিগাঁও অসামৰিক চিকিৎসালয়লৈ আহে যদিও এখন বিচনাৰ কাৰণে হাহাকাৰ কৰিবলগীয়া হৈছে ৰোগীয়ে।

কেৱল বিচনাই নহয় ৷ অসামৰিক চিকিৎসালয়খনত সাধাৰণ বিভাগত বিদ্যুতৰ দুৰৱস্থা ৷ যাৰ বাবে ঘণ্টাৰ পাছত ঘণ্টা আন্ধাৰত ডুব গৈ থাকিবলগীয়া হয় চিকিৎসালয় খনৰ সাধাৰণ বিভাগৰ ৰোগীসকল। পিছে ৰোগীৰ এই অৱস্থাৰ প্ৰতি অলপো কাণসাৰ নাই মৰিগাঁৱৰ স্থানীয় বিধায়ক ৰমাকান্ত দেউৰীৰ । লগতে ৰাজ্যিক স্বাস্থ্য মন্ত্ৰী আৰু মৰিগাঁও জিলা যুটীয়া স্বাস্থ্য সঞ্চালকে সকলো দেখিও কোনো ব্যৱস্থা গ্ৰহণ নকৰা বুলি অভিযোগ কৰে স্থানীয় তথা ৰোগীসকলে।