জাগীৰোড,১৪ জুনঃ জাগীৰোডত উদণ্ড যুৱকে সেনা জোৱানৰ ওপৰত আক্ৰমণ চলোৱাৰ গুৰুতৰ অভিযোগ। অভিযোগ অনুসৰি,সেনা জোৱান তথা পৰিয়ালক প্ৰাণে মৰাৰ চেষ্টা কৰাৰ লগতে সুৰাসক্ত উদণ্ড যুৱকৰ দলে ভাঙিলে সেনাজনৰ গাড়ীৰ আইনা। আক্ৰমণ চলিল কাশ্মীৰৰ পুলৱামা জিলাত কৰ্মৰত কামপুৰৰ সেনা জোৱান বিশ্বদ্বীপ বৰুৱাৰ বাহনত। ভাৰতীয় সেনাৰ অসম ৰেজিমেন্টত কৰ্মৰত জোৱান বিশ্বদ্বীপ বৰুৱাই নিজ ঘৰৰ পৰা পৰিয়ালৰ সৈতে গুৱাহাটী বিমান বন্দৰলৈ যোৱাৰ পথত জাগীৰোডত সন্মুখীন হয় এক অনাকাংক্ষিত পৰিস্থিতিৰ ৷ জোৱান জনৰ AS-02N-4493 নম্বৰৰ গাড়ীখনৰ চালকজনে পথ এৰি দিয়াত কিছু পলম হোৱাৰ বাবেই আক্ৰমণৰ বলি হয় জোৱানজনৰ লগতে পৰিয়ালৰ লোক ৷
জাগীৰোডত সেনা জোৱানৰ ওপৰত সুৰামত্ত যুৱকৰ আক্ৰমণৰ অভিযোগ চিনেমাৰ কায়দাৰে পিছফালৰ পৰা অহা এখন স্ক’ৰপিঅ গাড়ীয়ে আগভেটি ধৰে জোৱানজনৰ গাড়ীখনক ৷ লগে লগে সেই গাড়ীখনৰ পৰা নামি অহা ৩/৪ জনীয়া উদণ্ড সুৰামত্ত যুৱকে মাৰপিট আৰম্ভ কৰে জোৱান জনৰ গাড়ী চালকক ৷ ইমানতো ক্ষান্ত নাথাকি এটা সময়ত স্ক’ৰপিঅ গাড়ীখনৰ পৰা লাঠি উলিয়াই আনি উপৰ্যুপৰি আক্ৰমণ কৰে বাহনখনত ৷ বাৰে বাৰে কাতৰ অনুৰোধ কৰাৰ পিছতো নিৰ্মমভাৱে আত্যাচাৰ চলাই গাড়ীখনৰ লগতে চালকজনক ৷ যাৰ ফলত গাড়ীখনৰ আইনা ভাঙি চূৰমাৰ হয় ৷ সমান্তৰালকৈ বিভিন্ন গালি গালাজ কৰাৰ লগতে গাড়ীখনত থকা মহিলাকো অশ্লীল ব্যৱহাৰ কৰে যুৱকৰ দলটোৱে ৷ পৰৱৰ্তী সময়ত ঘটনাস্থলীত আৰক্ষী উপস্থিত হয় যদিও আৰক্ষীকো আওকাণ কৰে যুৱকৰ দলটোৱে । এটা সময়ত যুৱকৰ দলটোৰ পৰা আৰক্ষীয়ে নয়ন পাঠক নামৰ যুৱকজনক আটক কৰে যদিও দলটোৰ আন সুৰামত্ত উদণ্ড যুৱক-যুৱতীকেইজন পলাই যাবলৈ সক্ষম হয় ৷ ইতিমধ্যে ঘটনা সন্দৰ্ভত সামৰিক বাহিনীৰ জোৱান বিশ্বদ্বীপ বৰুৱাই এখন এজাহাৰ দাখিল কৰিছে জাগীৰোড আৰক্ষী থানাত ৷
