মৰিগাঁও, 27 জানুৱাৰীঃদেওবাৰে মৰিগাঁৱত গীত মাত আৰু গ্ৰন্থ উন্মোচনৰে সামৰণি পৰিল তিনিদিনীয়া তিৱা মহোৎসৱ ৷ বিশ্ব দৰবাৰত তিৱা জনগোষ্ঠীক এটা পূৰ্ণাংগ তথা শক্তিশালী জাতি ৰূপে প্ৰতিষ্ঠা কৰাৰ লক্ষ্যৰে মৰিগাঁও কামৰূপ জিলা সীমান্তৱৰ্তী টোপাতলী তিৱা সাংস্কৃতিক গৱেষণা কেন্দ্ৰত তিনিদিনীয়া কাৰ্যসূচীৰে বৰ্ণাঢ্য তিৱা মহোৎসৱ অনুষ্ঠিত কৰা হৈছিল ৷ 24 জানুৱাৰীৰ পৰা 26 জানুৱাৰীলৈ অনুষ্ঠিত হোৱা এই তিৱা মহোৎসৱৰ দেওবাৰে সামৰণি পৰে ৷
উল্লেখ্য যে এই তিৱা মহোৎসৱত উদ্ভাষিত হ'ল তিৱাসকলৰ অন্যতম উৎসৱ 'ছগ্ৰা মিছাৱা' মনোৰম সাংস্কৃতিক দৃশ্য৷ সদৌ তিৱা ছাত্ৰ সন্থা কামৰূপ জিলা সমিতিৰ উদ্যোগত অনুষ্ঠিত হোৱা এই সাংস্কৃতিক সমাহাৰত বিভিন্ন জনগোষ্ঠীয় খাদ্য সম্ভাৰে খাদ্যৰসিক সকলক আৰ্কষণ কৰে ৷ দেওবাৰৰ এই তিৱা মহোৎসৱত অংশলৈ তিৱা স্বায়ত্ব পৰিষদৰ মুখ্যকাৰ্যবাহী সদস্য পৱন মান্তাই স্বগোষ্ঠীয় ছাত্ৰ সংগঠনটোৰ উদ্যোগত তিৱাসকলক এটা শক্তিশালী জাতি হিচাপে বিশ্বত চিনাকি কৰি দিয়াৰ বাবে ধন্যবাদ জনাই৷ লগতে তেওঁ এই মহোৎসৱক জাতীয় অনুষ্ঠান ৰূপে তিৱা স্বায়ত্ব পৰিষদে স্বীকৃতি দিব বুলিও মন্তব্য কৰে৷ ইয়াৰোপৰিও এই মুকলি সভাতে উন্মোচন কৰা হয় এখন গ্ৰন্থ ৷ এই মহোৎসৱৰ মুকলি সভাত জনগোষ্ঠীটোৰ কেইবাজনো ৰাজনৈতিক নেতা তথা ছাত্ৰ নেতা উপস্থিত হৈ জনগোষ্ঠীটোৰ ভাষা সংস্কৃতিক বিশ্ব দৰবাৰত প্ৰতিষ্ঠা কৰাৰ বাবে ল'বলগীয়া পদক্ষেপৰ বিষয়ে আলোচনা আগবঢ়ায়।
লগতে পঢ়ক - কোৰোণা ভাইৰাছ ৰোধৰ বাবে ভেকচিন প্ৰস্তুতি খৰটকীয়া কৰিছে চীনে