মৰিগাঁও, 15 ছেপ্টেম্বৰ : অসম গণ পৰিষদৰ উদ্যোগত মৰিগাঁৱত ছাত্ৰ পৰিষদৰ ৪১ জনীয়া সমিতি গঠন কৰা হয় । মৰিগাঁও পবিতৰা হাট প্ৰেক্ষাগৃহত ৰাজু বৰদলৈৰ পৌৰহিত্যত অনুষ্ঠিত সাধাৰণ সভাত সৰ্বসন্মতি ক্ৰমে মানস জ্যোতি শইকীয়াক সভাপতি, অসীম ডেকাক উপসভাপতি, জিতু দাসক সম্পাদক হিচাপে লৈ এখন শক্তিশালী জিলা সমিতি গঠন কৰা হয় । অসম গণ পৰিষদৰ ভাতৃ সংগঠন তথা ছাত্ৰ পৰিষদৰ সমিতি গঠনৰ এই সভাত অসম গণ পৰিষদৰ মূল সমিতিৰ মুখপাত্ৰ বাণী দাস, মৰিগাঁও জিলা সমিতিৰ সভাপতি শান্তনু শৰ্মা, খালিছুদ্দিন আহমেদকে আদি কৰি বহুকেইজন জিলা সমিতিৰ অগপৰ নেতাই বক্তব্য ৰাখে ৷
ইয়াৰোপৰি ছাত্ৰ পৰিষদৰ ৰাজ্যিক সমিতিৰ সভাপতি ত্ৰিনয়ন বৰুৱাৰ প্ৰমুখ্যে বহুকেইজন ছাত্ৰ নেতাই অসম গণ পৰিষদৰ লক্ষ্য আৰু উদ্দেশ্যেৰ বিষয়ে ব্যাখ্যা আগবঢ়াই । মৰিগাঁও সমষ্টি সমিতিৰ সম্পাদক ৰাজীৱ কাকতিয়ে আঁতধৰা এই ছাত্ৰ পৰিষদৰ সভাত মৰিগাঁও জিলা সম্পাদক বিজয় কুমাৰ নাথে মিত্ৰদলটোক কটু ভাষাৰে সমালোচনা কৰি কয় যে, আজি বিনামূলীয়া চাউল আমাৰ দলৰ যোগান মন্ত্ৰী ফণীভূষণ চৌধুৰীৰ নেতৃত্বত দিয়া হৈছে । কৃষকক টেক্টৰ দিছে অগপৰ সভাপতি তথা কৃষি মন্ত্ৰী অতুল বৰাৰ নেতৃত্বত ৷ শাসকীয় দলটোৱে কেৱল তেওঁলোকে দিয়া বুলি ৰাইজৰ আগত ফিতাহি মাৰি ফুৰে বুলি কয় সম্পাদকগৰাকীয়ে ।