মাজুলীত মৰণোত্তৰ পৰীক্ষা নকৰাকৈ মৃতদেহ ওভতাই দিলে পৰিয়ালক

মাজুলীত উতপ্ত পৰিস্থিতি ৷ নৈত ওপঙি থকা মৃতদেহ মৰণোত্তৰ পৰীক্ষা নকৰাকৈ ওভতাই পালে পৰিয়ালে ৷ পুনৰ মৰণোত্তৰ পৰীক্ষাৰ বাবে মৃতদেহ নিবলৈ ফোন ৷ বিভাগীয় বিষয়া-কৰ্মচাৰী নহা পৰ্যন্ত ৰাইজে মৃতদেহ নপথোৱাৰ সিদ্ধান্ত ৷

মাজুলী,11ছেপ্টেম্বৰঃ মঙলবাৰে নিশা মাজুলীৰ শুকানসুঁতি নৈৰ বুকুত উদ্ধাৰ হৈছিল জেংৰাইমুখ আৰক্ষী থানাৰ অন্তৰ্গত বঙালকটা গাঁৱৰ ভাস্কৰ বৰা নামৰ এজন যুৱকৰ মৃতদেহ । পাচত মৃতদেহটো উদ্ধাৰ কৰি আৰক্ষীয়ে নিশাই মৰণোত্তৰ পৰীক্ষাৰ বাবে গড়মূৰ অসামৰিক চিকিৎসালয়লৈ লৈ যায় । কিন্তু আশ্চর্যজনক কথা যে মৃতদেহ মৰণোত্তৰ পৰীক্ষা নকৰাকৈয়ে দুদিনৰ পাচত বুধবাৰে ঘৰলৈ ওভতাই পথোৱাত গাঁওবাসী ৰাইজৰ মাজত তীব্ৰ উত্তেজনা বিৰাজ কৰিছে । ইপিনে বিভাগীয় গড়মূৰ অসামৰিক চিকিৎসালয়ৰ কৰ্তৃপক্ষৰ এই দায়িত্বজ্ঞানহীন কাৰ্যত উত্তেজিত ৰাইজে ফোনেৰে যোগাযোগ কৰিছিল যদিও পুনৰ মৃতদেহ মৰণোত্তৰ পৰীক্ষাৰ বাবে লৈ যাবলৈ কয় । আনহাতে এই কথাত ক্ষুব্ধ ৰাইজে বিভাগীয় দায়িত্বশীল বিষয়া গাঁওখনলৈ নিজে নহা পৰ্যন্ত মৃতদেহটো মৰণোত্তৰ পৰীক্ষাৰ বাবে নপথোৱাৰ সিদ্ধান্ত লৈছে । এই কাৰ্যই পুনৰ ৰাজ্যৰ স্বাস্থ্যখণ্ডৰ বিভাগীয় বিষয়া-কৰ্মচাৰীসকলৰ অমনোযোগীতাৰ বিষয়ে উদঙাইছে ৷