মাজুলী, 26 মাৰ্চঃনদীদ্বীপ মাজুলীৰ সুৰক্ষাৰ নামত টি কে ইঞ্জিনিয়াৰিং প্ৰতিষ্ঠানৰ লুন্ঠনৰাজৰ অভিযোগ ৷ মাজুলীৰ সুৰক্ষাৰ বাবে বিগত 16 মাহত জিঅ' বেগেৰে বেংক ৰিবেডমেন্টৰ কামৰ 50 শতাংশও কাম নকৰিলে প্ৰতিষ্ঠানটোৱে ৷ যাৰ ফলত বাৰিষা চমু চাপি অহাৰ লগে লগে আপোন ঘৰখন হেৰুৱাৰ আশংকাত শংকিত হৈ পৰিছে জিলাখনৰ নৈ পৰীয়া ৰাইজ ৷ ব্ৰহ্মপুত্ৰ ব'ৰ্ড নামৰ কেন্দ্ৰীয় সংস্থাটোৱে 18 মাহৰ পূৰ্বে 238 কোটি টকাৰে ব্ৰহ্মপুত্ৰৰ গতিপথত 27 কি. মি. জিঅ' বেগেৰে বেংক ৰিবেডমেন্ট আৰু 42 খন আৰ চি চি পাৰ্কিউপাইনৰ এক অভিলাষী আঁচনিৰে টি কে ইঞ্জিনিয়াৰিং প্ৰতিষ্ঠানৰ যোগেদি মাজুলী স্থায়ী সুৰক্ষাৰ বাবে আৰম্ভ কৰিছিল কাম ৷
টি কে ইঞ্জিনিয়াৰিং প্ৰতিষ্ঠানৰ মইমতালি নিৰ্ধাৰিত সময়সীমা অনুসৰি 18 মাহত সমাপ্ত কৰিবলগীয়া এই আঁচনিৰ কামৰ 19 মে'ত প্ৰতিষ্ঠানটোৱে শেষ কৰিব লাগে যদিও বৰ্তমানে বাৰিষা আহি পালে তৎস্বত্বেও মাজুলী সুৰক্ষাৰ 50 শতাংশও কাম শেষ কৰিব পৰা নাই প্ৰতিষ্ঠানটোৱে ৷ তাৰ বিপৰীতে ব্ৰহ্মপুত্ৰৰ পাৰ খান্দি গছ-বন কাটি মুকলি কৰি পেলাই থৈছে প্ৰতিষ্ঠানটোৱে ৷ ইপিনে অৰুণাচলৰ এগৰাকী কেন্দ্ৰীয় ৰাজ্যিক মন্ত্ৰীৰ আত্মীয় হোৱাৰ সুবাদতে নিজৰ মইমতালিৰে বিভাগ তথা ৰাজ্য চৰকাৰক বুঢ়া আঙুলি দেখুৱাই সময়মতে প্ৰতিষ্ঠানটোৱে কামত হেমাহি কৰি আহিছে বুলি অভিযোগ তুলিছে মাজুলীবাসীয়ে ৷ লগতে শ্ৰমিকক মজুৰি নিদিয়া, জিঅ' বেগৰ যোগান নধৰাৰ উপৰি অতি নিম্নমানৰ জিঅ' বেগ, আৰ চি চি পাৰ্কিউপাইনেৰে কাম কৰাৰো অভিযোগ মাজুলীবাসীৰ ৷
উল্লেখ্য যে, সময়মতে প্ৰতিষ্ঠানটোৱে কাম নকৰাত 20 দিনৰ পূৰ্বে মুখ্যমন্ত্ৰী সৰ্বানন্দ সোণোৱালে প্ৰতিষ্ঠানটোৰ বিষয়ববীয়াৰ লগত বৈঠকত মিলিত হৈ বিষয়ববীয়াসকলক অতিশীঘ্ৰে কাম সমাপ্ত কৰিবলৈ ধমক দিছিল যদিও তাৰ পাচতো কোনো গা নলৰিল প্ৰতিষ্ঠানটোৰ কৰ্মকৰ্তাৰ ৷
