আৰ্থিক বিপ্লৱত হেঙাৰ; ব্ৰইলাৰ কুকুৰা পালকক সমাজচ্যুত কৰি সংবিধান ৰক্ষাৰ শান্তনা লাভ শংকৰ সংঘৰ

এলান্ধুকলীয়া ৰীতি-নীতিৰ বাবে ইটোৰ পিচত সিটো বিতৰ্কত সোমাইছে শংকৰ সংঘ ৷ ব্ৰইলাৰ পুহি স্বাৱলম্বনৰ পথ বাছি লোৱাৰ বাবেই শংকৰ সংঘই অনিৰ্দিষ্টকাললৈ সমাজচ্যুত কৰিলে এটা পৰিয়ালক ৷

বিহপুৰীয়া, 25 জুন:‘‘কৰ্মই ধৰ্ম’’, ‘‘কৰ্মলৈ লাজ কৰিব নালাগে’’, ‘‘কোনো কামেই সৰু নহয়’’ এই ধৰণৰ উৎসাহবাণী আপুনি নিশ্চয় শুনিছে ৷ হয়, কৰ্মইহে মানুহৰ প্ৰকৃত ধৰ্ম ৷ কৰ্মৰ দ্বাৰাহে এজন মানুহৰ প্ৰকৃত পৰিচয় প্ৰকাশ পায় ৷ সৎভাৱে কৰা প্ৰতিটো কৰ্মই মানুহৰ সুখী হোৱাৰ বাট দেখুৱাই ৷ এই কথাবোৰ আমাৰ বহুতেই বুজে ৷ কিন্তু বহুতেই নুবুজে ৷ বৰ্তমান সময়ত দেশত নিবনুৱা সমস্যাৰ অনুপাতে চাকৰিৰ সংখ্যা তাকৰ ৷ সেয়ে বহু যুৱক-যুৱতীয়ে চাকৰিৰ বিকল্প পথ বাচি লৈছে ৷ ব্যৱসায়, পশুপালন, কৃষি আদি বিভিন্ন পন্থা অৱলম্বন কৰি স্বাৱলম্বী হোৱাৰ চেষ্টা কৰি আহিছে অসমৰো বহু যুৱক-যুৱতীয়ে ৷ কিন্তু বহু ক্ষেত্ৰত তেওঁলোক বাধাৰ সন্মুখীন হৈ আহিছে ৷

এইল বাধা হৈছে প্ৰধানতঃ সামাজিক বাধা ৷ শিক্ষিত যুৱকক সৰু-সুৰা ব্যৱসায় আৰম্ভ কৰিলে উপলুঙা কৰাৰ পৰা আৰম্ভ কৰি গাহৰি, ব্ৰইলাৰ আদি পুহিলে সমাজচ্যুত কৰালৈকে ৷ এনে বাধাই যুৱপ্ৰজন্মৰ ওপৰত যে কেৱল কেৱল মানসিক চাপ পেলাই তেনে নহয় ৷ অৰ্থনৈতিক বিকাশৰ বাটতো হেঙাৰৰ সৃষ্টি কৰে ৷ এই ধৰণৰ বিষয়ত প্ৰায়েই উচ্চাৰিত হোৱা এটা নাম হৈছে শ্ৰীমন্ত শংকৰদেৱ সংঘ ৷ শংকৰ গুৰুজনাই যিডাল একতাৰ এনাজৰীৰে সকলোকে বান্ধিছিল, সেই গুৰুজনাৰ আদৰ্শ ৰক্ষাৰ নামত যেন সমাজত নিজৰ শাসন চলোৱাত উঠি-পৰি লাগিছে শংকৰ সংঘৰ একাংশ বিষয়-ববীয়া ৷

পুনৰ এবাৰ এঘৰীয়া প্ৰসংগত বিতৰ্কত নাম সাঙোৰ খাই পৰিছে শংকৰ সংঘৰ ৷ শংকৰ সংঘৰ নামত ৰাইজক সমাজচ্যুত কৰাৰ ধৃষ্টতা একাংশৰ ৷ ব্ৰইলাৰ পুহি স্বাৱলম্বনৰ পথ বাছি লোৱাৰ বাবেই শংকৰ সংঘই অনিৰ্দিষ্টকাললৈ সমাজচ্যুত কৰিলে এটা পৰিয়ালক ৷ নাৰায়ণপুৰৰ দুলিয়াপথাৰৰ মিণ্টু নেওগৰ পৰিয়ালটো শ্ৰীমন্ত শংকৰদেৱ সংঘৰ নাৰায়ণপুৰ আঞ্চলিকৰ অন্তৰ্ভুক্ত আছিল ৷ চলিত বৰ্ষৰ ফেব্ৰুৱাৰী মাহত মিণ্টু নেওগে স্বাৱলম্বী হোৱাৰ সপোন দেখি ব্ৰইলাৰ মুৰ্গী পালন কৰাৰ সিদ্ধান্ত লয় ৷

তাৰ পিচতে যোৱা 8 মাৰ্চত পৰিয়ালটোলৈ শংকৰ সংঘৰ পৰা এক জাননী প্ৰেৰণ কৰি পৰিয়ালটোক সমাজচ্যুত কৰে ৷ জাননীখনত উল্লেখ আছিল যে, অসাংবিধানিক কাৰ্য কৰাৰ বাবে সমাজচ্যুত কৰাৰ সিদ্ধান্ত লৈছিল সংঘৰ ফালৰ পৰা ৷

"যোৱা 8.03.2023 তাৰিখৰ কাৰ্যকৰী সভাৰ সৰ্বসন্মতি ক্ৰমে গ্ৰহণ কৰা সিদ্ধান্ত মৰ্মে আপোনাক জনোৱা হয় যে আপোনাৰ গৃহত অসম শংকৰ সংঘৰ নীতি বহিৰ্ভূত যি অসংবিধানিক কাৰ্য কৰাৰ বাবে আজিৰ তাৰিখৰ পৰা অনিৰ্দিষ্টকাললৈ প্ৰথমিকৰ পৰা সংগবিৰতি কৰা হৈছে ৷" শ্ৰীমন্ত শংকৰদেৱ সংঘৰ দুলীয়াপথাৰ প্ৰাথমিক শাখাৰ সম্পাদক পংকজ বৰাই স্বাক্ষৰ কৰা এই পত্ৰযোগে ঘৰখনক প্ৰাথমিক শাখাৰ পৰা বহিষ্কাৰ কৰে । শ্ৰীমন্ত শংকৰদেৱ সংঘৰ প্ৰচলিত নিয়মৰ বিপৰীতে অসংবিধানিক কৰ্মত লিপ্ত হোৱাৰ কাৰণ দৰ্শাই প্ৰাথমিকৰ সাধাৰণ সদস্য পদৰ পৰা বহিষ্কাৰ কৰে ।

ইফালে শেহতীয়াকৈ পৰিয়ালৰ এগৰাকী ব্যক্তিৰ মৃত্যু হৈছিল ৷ কিন্তু পৰিয়ালটো কোনো সমাজৰ অন্তৰ্ভুক্ত নোহোৱাৰ বাবে পৰম্পৰাগত নীতি-নিয়ম অনুসৰি সংস্কাৰ হ'ব পৰা নাই ৷ বিগত এমাহ ধৰি গোঁসাই ঘৰত বন্তি এগছ জ্বলাব পৰা নাই বহিস্কৃত পৰিয়ালটোৱে ।

উল্লেখ্য যে, শ্ৰীমন্ত শংকৰদেৱ সংঘৰ এগৰাকী একনিষ্ঠ সেৱক মিন্টু নেওগে মীন পালন, জাৰ্চী গাইৰ লগতে ব্ৰইলাৰ পালনেৰে স্বাৱলম্বী হোৱাৰ চেষ্টা চলাইছিল ৷ শ্ৰীমন্ত শংকৰদেৱ সংঘৰ উক্ত সিদ্ধান্তৰ পিছত সম্প্ৰতি উপায়হীন হৈছে পৰিয়ালটো । বিজ্ঞান প্ৰযুক্তিৰ দ্ৰুত উন্নয়নৰ সমান্তৰালকৈ অত্যাৱশ্যকীয় সামগ্ৰীৰ দামবৃদ্ধিৰ সময়ত এটা চাকৰি বিচাৰি হাহাকাৰ কৰিবলগীয়া হৈছে যুৱ প্ৰজন্মই ৷ তেনেসময়ত ক্ষুদ্ৰ ব্যৱসায়তো বিধি-পথালি দিয়া এনে নিয়ম কানুনৰ সমালোচনা কৰিছে ভিন্নজনে ৷

লগতে পঢ়ক:Villagers refused to bury body: এঘৰীয়া লোকৰ ঘৰত নিমন্ত্ৰণ খোৱাৰ বাবেই মৃতদেহ সৎকাৰৰ বাবে নাহিল ৰাইজ