লখিমপুৰত ভুৱা প্ৰতিষ্ঠান খোলাৰ নামত প্ৰৱঞ্চকৰ জাল

ভুৱা প্ৰতিষ্ঠান খোলাৰ টোপ দি কোনো দুষ্ট চক্ৰই সৰকাইছে লাখ লাখ টকা । অৱশেষত লখিমপুৰ ছাত্ৰ সন্থাৰ তৎপৰতাত জালত পৰিল দুষ্ট চক্ৰটোৰ নায়ক আটিকুল ইছলাম আৰু খাজাল উদ্দিন ৷

লখিমপুৰ, 18 মে': নকল টকা বা নকল সোণৰ পিছত এইবাৰ লখিমপুৰৰ বঙালমৰাত ভুৱা প্ৰতিষ্ঠান খোলাৰ নামত প্ৰৱঞ্চকৰ জাল । ভুৱা প্ৰতিষ্ঠান খোলাৰ টোপ দি কোনো দুষ্ট চক্ৰই অৰুণাচল নাগালেণ্ডৰ একাংশ লোকৰ পৰা সৰকাইছে লাখ লাখ টকা । অৱশেষত লখিমপুৰ ছাত্ৰ সন্থাৰ তৎপৰতাত জালত পৰিল দুষ্ট চক্ৰটোৰ নায়ক আটিকুল ইছলাম আৰু খাজাল উদ্দিন । ধন দিবলৈ আহি নাগালেণ্ডৰ দুই যুৱকৰ সন্দেহ হোৱাত সহায় বিচাৰিলে ছাত্ৰ সন্থাৰ ।

উল্লেখ্য যে, ধন দিয়াৰ সময়তে ছাত্ৰ সন্থাৰ একাংশ সদস্যই দুষ্ট চক্ৰটোৰ নায়ক আটিকুল ইছলাম আৰু খাজাল উদ্দিনক আটক কৰি গতাই দিয়ে লখিমপুৰ আৰক্ষীক। ইপিনে ছাত্ৰ সংগঠনৰ সদস্যই দিয়া তথ্য অনুসৰি পূৰ্বেও নাগালেণ্ডৰ দুই ব্যক্তিৰ পৰা দুষ্ট চক্ৰটোৱে সৰকাইছিল ১০ লাখ টকা ৷ বৰ্তমান সমগ্ৰ ঘটনা সন্দৰ্ভত লখিমপুৰ আৰক্ষীয়ে দুয়োকে সোধা পোছা অব্যাহত ৰখাৰ লগতে চক্ৰটোৰ লগত জড়িত আন সদস্যৰ সন্ধান অব্যাহত ৰাখিছে ।