বিজেপি কৰ্মীয়ে ভাঙিলে তৃণমূল কংগ্ৰেছৰ বাসগৃহ

পশ্চিমবংগৰ কোচবিহাৰ জিলাৰ বক্সিৰহাট থানাৰ দক্ষিণ ৰামপুৰত বিজেপি দলৰ সমৰ্থক আৰু তৃণমূল কংগ্ৰেছৰ কৰ্মী-সমৰ্থকে লিপ্ত হয় সংঘাতত । বিজেপীৰ কৰ্মীয়ে ভাঙি পেলাই তৃণমূল কংগ্ৰেছৰ বাসগৃহ।

গোসাইগাঁও, ২১ জুলাই : দেওবাৰে পশ্চিমবংগৰ কোচবিহাৰ জিলাৰ বক্সিৰহাট থানাৰ দক্ষিন ৰামপুৰত বিজেপি দলৰ সমৰ্থক আৰু তৃণমূল কংগ্ৰেছৰ কৰ্মী-সমৰ্থক সকল লিপ্ত হয় সংঘাতত । বিজেপি দলৰ কৰ্মী-সমৰ্থকে তৃণমূলৰ দলীয় কাৰ্যালয় লণ্ডভণ্ড কৰাৰ উপৰিও তৃণমূল কৰ্মী-সমৰ্থকৰ চাৰিটা ঘৰ ভাঙি তছ-নছ কৰে । বিজেপি কৰ্মীৰ আক্ৰমনত দক্ষিন ৰামপুৰ গাঁৱৰ 70 বছৰীয়া সাধনা সাহা নামৰ এগৰাকী মহিলা গুৰুতৰভাৱে আহত হয় । বিজেপিৰ আক্ৰমণৰ পৰা প্ৰাণ ৰক্ষা কৰিবলৈ তৃণমূলৰ চাৰি-পাঁচ জন কৰ্মী সমৰ্থকে আজি দিনৰ ১২-৩০ মান বজাত বংগ সীমা অতিক্ৰম কৰি অসম সীমাত প্ৰৱেশ কৰে । কোকৰাঝাৰ জিলাৰ গোসাঁইগাঁও মহকুমাৰ অসম-বংগ সীমান্তৰ ফাইলাগুৰী বজাৰত আহি আশ্ৰয় লোৱা তৃণমূল কংগ্ৰেছৰ কৰ্মী-সমৰ্থকে সাংবাদিকৰ আগত প্ৰকাশ কৰে যে লোকসভা নিৰ্বাচনত বিজেপি দলে জয়লাভ কৰাৰ পাছত, চুবুৰীয়া ৰাজ্যৰ বিভিন্ন অঞ্চলত ৰাজনৈতিক হিংসা-আক্ৰমণ অব্যাহত থকা সময়তে অসম-বংগ সীমান্তৰ দক্ষিন ৰামপুৰত বিজেপি দলৰ উদণ্ড সমৰ্থকে তৃণমূল কংগ্ৰেছ কৰ্মী-সমৰ্থকৰ ওপৰত পৰিকল্পিতভিৱে আক্ৰমণ চলাই আছে ।

ইফালে, বিজেপি সমৰ্থকৰ আক্ৰমণৰ বাবে একাংশ তৃণমূল কংগ্ৰেছৰ কৰ্মী-সমৰ্থকে আত্মৰক্ষাৰ বাবে অসমত থকা আত্মীয়ৰ গৃহত গৈ আশ্ৰয় ল'বলগীয়া হয় । বিগত লোকসভা নিৰ্বাচনত বিজেপি দলৰ প্ৰাৰ্থী জয়ী হোৱাৰ পাছৰে পৰা একাংশ সমাজ বিৰোধী আৰু সুযোগসন্ধানী লোকে বিজেপিত নাম লিখাই তৃণমূল কংগ্ৰেছ কৰ্মী-সমৰ্থকৰ ওপৰত এনে পৰিকল্পিত আক্ৰমণ চলাই আছে বুলি অভিযোগ কৰে অঞ্চলবাসীয়ে ।