ত্ৰিপুৰাত উদ্ধাৰ অসমৰ জীয়ৰীৰ মৃতদেহ

মৃতদেহ উদ্ধাৰক কেন্দ্ৰ কৰি ত্ৰিপুৰাৰ ধৰ্মনগৰত চাঞ্চল্য ৷ ঘটনাটো হত্যাকাণ্ড বুলি অভিহিত কৰিছে একাংশই ৷

কৰিমগঞ্জ,21 আগষ্টঃত্ৰিপুৰাত উদ্ধাৰ অসমৰ জীয়ৰীৰ মৃতদেহ ৷ ঘটনাক কেন্দ্ৰ কৰি উত্তৰ ত্ৰিপুৰাৰ ধৰ্মনগৰত চাঞ্চল্য ৷ বুধবাৰে পুৱাৰ ভাগত উত্তৰ ত্ৰিপুৰা জিলাৰ ধৰ্মনগৰ বিবিআই স্কুলৰ খেল পথাৰৰ চাৰ্পোট কমপ্লেক্সৰ সন্মুখত একাংশ লোকে এটা মৃতদেহ প্ৰত্যক্ষ কৰাৰ পিছতেই সৃষ্টি হয় চাঞ্চল্যৰ ৷ মৃতদেহটো প্ৰত্যক্ষ কৰি স্থানীয় ৰাইজে খবৰ দিয়ে ধৰ্মনগৰ আৰক্ষী থানাত । আৰক্ষীৰ লোকে ঘটনাস্থলীত উপস্থিত হৈ মৃতদেহ উদ্ধাৰ কৰি মৃতদেহটো অনিতা নাথ নামৰ ত্ৰিপুৰাৰ এগৰাকী বোৱাৰীৰ বুলি চিনাক্ত কৰে ৷মহিলাগৰাকীৰ শৰীৰত চোকা অস্ত্ৰৰ দ্বাৰা আঘাতৰ চিন স্পষ্ট ।

আনহাতে অনিতা নাথৰ পিতৃ গৃহ হৈছে কৰিমগঞ্জৰ বদৰপুৰত । দহ বছৰ পূৰ্বে ধৰ্মনগৰ এলেকাৰ সুদীপ নাথৰ সৈতে বিয়া হৈছিল অনিতাৰ । বিগত ছমাহ পূৰ্বে স্বামীৰ মৃত্যু হোৱাৰ পিছৰে পৰাই সম্পত্তিৰ কাৰণে অনিতাৰ সৈতে কাজিয়া চলিছিল সুদীপ নাথৰ এজন ভাতৃৰ সৈতে । যাৰবাবে মাটি বাৰীৰ সম্পত্তিৰ কাৰণে এই হত্যাকাণ্ড সংঘটিত হৈছে বুলি ধাৰণা কৰিছে একাংশই । আৰক্ষীয়ে ইতিমধ্যে সুদীপ নাথৰ জেষ্ঠ ভাতৃ আৰু তেওঁৰ পুত্ৰক আটক কৰিছে সোধপোচৰ বাবে ।