ত্ৰিপুৰা আৰক্ষীৰ হাতত আটক অসমৰ দুই ড্ৰাগছ সৰবৰাহকাৰী

পঞ্চাশ লাখ টকা মূল্যৰ 52 গ্ৰাম ব্ৰাউন চুগাৰ সৈতে ত্ৰিপুৰা আৰক্ষীৰ হাতত জব্দ কৰিমগঞ্জৰ দুই যুৱক ৷

কৰিমগঞ্জ,4 জুলাই : ত্ৰিপুৰা আৰক্ষীৰ জালত আজি বুজন পৰিমাণৰ ব্ৰাউন চুগাৰ সৈতে আটক হৈছে কৰিমগঞ্জৰ দুগৰাকী যুৱক । 52 গ্ৰাম ব্ৰাউন চুগাৰ সৈতে আটক হোৱা যুৱক দুজন হৈছে বিলাল আহমেদ আৰু জহৰুল ইছলাম ৷ দুৱোজনৰে ঘৰ কৰিমগঞ্জ জিলাৰ পাথাৰকান্দি আৰক্ষী থানাৰ অন্তৰ্গত কাচৰঘাঠ গাঁওত । অসম ত্ৰিপুৰা সংযোগী বিকল্প ৰাষ্ট্ৰীয় ঘাইপথ হিচাপে পৰিচিত চান্দখিৰা কাঠলতলী পথেৰে AS 11 G 0240 নম্বৰৰ এখন বাইক লৈ ত্ৰিপুৰা প্ৰৱেশ কৰোতেই ত্ৰিপুৰা আৰক্ষীৰ জালত পৰিছে এই দুই ড্ৰাগছ সৰবৰাহকাৰী ৷ যুৱক দুজনৰ পৰা মুঠ চাৰিটা ব্ৰাউন চুগাৰ পেকেট জব্দ কৰা হৈছে । জব্দ হোৱা ব্ৰাউন চুগাৰ বজাৰ মুল্য হব প্ৰায় পঞ্চাশ লাখ টকা ৷ এই ঘটনাৰ দ্বাৰা পুনৰ প্ৰমাণিত যে ত্ৰিপুৰাত ড্ৰাগছ সৰবৰাহৰ লগত বৰাক উপত্যকাৰ জড়িত আছে এটা বৃহৎ চক্ৰ ।