বোকাজান, 19 এপ্ৰিলঃ দ্বিতীয় পৰ্যায়ৰ ভোটগ্ৰহণ সম্পন্ন হোৱাৰ পাচতেই বোকাজানত সংঘটিত হয় পথ দুৰ্ঘটনা ৷ বোকাজানৰ কয়লামাটিৰ ভোটগ্ৰহণ কেন্দ্ৰৰ পৰা বোকাজান উচ্চতৰ মাধ্যমিক বিদ্যালয়ৰ ষ্ট্ৰং ৰুমলৈ ইভিএম সমূহ আনি থকা অৱস্থাতে বোকাজানত দুৰ্ঘটনাগ্ৰস্ত হয় এখন আৰক্ষীৰ বাহন ৷ দুৰ্ঘটনাত আঘাতপ্ৰাপ্ত হয় ১৫নং আৰক্ষী খণ্ড বিষয়াসহ কেইবাজনো লোক ৷
বোকাজানত দুৰ্ঘটনাগ্ৰস্ত আৰক্ষীৰ বাহন আৰক্ষীৰ দলটোৱে ইভিএম সমূহলৈ ষ্ট্ৰং ৰুমলৈ আহি থকাৰ পথতে নিয়ন্ত্ৰণ হেৰুৱাই দ’ খাৱৈত বাগৰি পৰে বাহনখন ৷ দুৰ্ঘটনাটোত গুৰুতৰভাৱে আঘাতপ্ৰাপ্ত হয় চালক সূৰ্য্য হাজৰিকা, সহ আৰক্ষী বিষয়া হীৰেন শইকীয়া, আৰক্ষীৰ কনিষ্টবল সুৰেশ ৰাভা, APTFৰ জোৱান বিশ্বজিত দৈমাৰী আৰু বাণীকান্ত মেধি । আহতসকলক প্ৰাথমিক চিকিৎসাৰ বাবে বোকাজান সমূহীয়া চিকিৎসালয়লৈ লৈ যোৱা হয় যদিও উন্নত চিকিৎসাৰ বাবে ডিমাপুৰলৈ প্ৰেৰণ কৰা হয় লোককেইজনক।
