ডিফু, 2 ছেপ্তেম্বৰ : কাৰ্বি আংলঙৰ আঞ্চলিক দল এ এছ ডি চিৰ(ASDC) চি চি ইউ, কাৰ্বি ছাত্ৰ সন্থা, জাকাছ, কে এন চি এ আৰু হিলছ ট্ৰাইবেল লীগৰ সৈতে যৌথ সংবাদমেল সম্বোধন ৷ সংবাদমেলৰ জৰিয়তে দলকেইটাই কাৰ্বি আংলং স্বায়ত্ব শাসিত পৰিষদৰ(Karbi Anglong Autonomous Council) মুখ্য কাৰ্যবাহী সদস্য তুলিৰাম ৰংহাঙৰ(Tuliram Ronghang) হাতত এখন স্মাৰক পত্ৰ প্ৰদান কৰে ৷
সংগঠনকেইটাৰ নেতৃত্বই সংবাদমেলখন সম্বোধন কৰি কয়, ‘‘আমি ৰাজ্য চৰকাৰ আৰু পৰিষদক স্পষ্ট কৰি দিব বিচাৰিছো যে সীমা সমস্যা, 1951 চনৰ সীমাৰ আধাৰতহে সমাধান কৰিব লাগিব ৷ চৰকাৰক 1995 চনৰ এম অ’ ইউ আৰু 2011 চনৰ এম অ’ এছ ৰূপায়ণ কৰাৰ দাবী জনাইছো ৷ আমি পৰিষদৰ ক্ষমতাত ৰাজ্য চৰকাৰৰ হস্তক্ষেপৰো বিৰোধিতা কৰিছো’’ ৷
এ এছ ডি চিৰ সভাপতি চন্দ্ৰকান্ত তেৰাঙে কয় যে, কাৰ্বি আংলং আৰু পশ্চিম কাৰ্বি আংলঙৰ 1951 চনৰ সীমা সুৰক্ষিত ৰাখিহে মুখ্যমন্ত্ৰীয়ে দিয়া আৰু লোৱা নীতি গ্ৰহণ কৰক ৷ 4 ছেপ্তেম্বৰত 6 টা বিদ্ৰোহী সংগঠনৰ লগত হ’ব লগা শান্তি চুক্তিক আদৰণি জনাই তেওঁ কয়, ‘‘কেৱল চুক্তি কৰিলেই নহয়, চৰকাৰে চুক্তি ৰূপায়ণত গুৰুত্ব দিয়ক’’ ৷
লগতে পঢ়ক:NHPC ৰ পৰা কি ক’লে শংকৰজ্য়োতি বৰুৱাই ?
আনহাতে, সংবাদমেলত চি চি ইউৰ উপ সভাপতি ৰবীন্দ্ৰ ৰংপিয়ে বহুকেইটা গুৰুত্বপূৰ্ণ মন্তব্য আগবঢ়ায় ৷ তেওঁ উমলাফেৰত ৰাইজ আৰু অসম আৰক্ষীয়ে ঐক্যবদ্ধ হৈ সীমা ৰক্ষা কৰাৰ বাবে আৰক্ষী আৰু ৰাইজক ধন্যবাদ জনায় ৷ কাৰ্বি আংলং জিলাৰ বনাঞ্চল দৈনিক বৃহৎ হাৰত ধ্বংস হোৱা বুলি প্ৰকাশ কৰে উপ সভাপতিগৰাকীয়ে ৷
বন বিভাগ নামৰ এটা বিভাগ আছেনে নাই বুলি প্ৰশ্ন কৰি চি চি ইউৰ উপ সভাপতি ৰবীন্দ্ৰ ৰংপিয়ে মুখ্য কাৰ্যবাহী সদস্য তুলিৰাম ৰংহাঙক বনাঞ্চল ৰক্ষাৰ দাবী জনায় ৷ আনকি সকলোৱে দেখাকৈ মাৰট লংৰি বন্যপ্ৰাণী অভয়াৰণ্য বেদখলকাৰীৰ কবলত পৰা বুলিও সংবাদমেলত সদৰী কৰে ৷
এনেধৰণৰ অবৈধ কাৰ্য কৰি থাকিলে সেউজীয়া কাৰ্বি আংলং সেউজীয়া হৈ নাথাকিব বুলি কৈ বন বিভাগক কিছু সততাৰে কাম কৰাৰ আহ্বান জনায় ৷ নেতাগৰাকীয়ে এক গুৰুতৰ অভিযোগ উত্থাপন কৰি কয় যে, স্বাক্ষৰ হ’ব লগা শান্তি চুক্তিত কাৰ্বি ভাষা সংবিধানৰ 8 নং অনুচ্ছেদত অন্তৰ্ভুক্ত কৰাৰ সিদ্ধান্ত লোৱা হৈছে ৷ কিন্তু তাৰ বাবে দেৱনাগৰী লিপি ল’ব লাগিব ৷
আৰ এছ এছে সংগঠনসমূহক এই হেঁচা দিয়া বুলি তেওঁ অভিযোগ উত্থাপন কৰে ৷ লিপিক লৈ 1971-72 চনত এক আন্দোলন হৈছিল আৰু কাৰ্বিসকলে ৰোমান লিপি গ্ৰহণ কৰে ৷ এতিয়া আকৌ দেৱনাগৰী লিপি গ্ৰহণ কৰাৰ বাবে কাৰ্বি ভাষা পিছপৰি ৰ’ব নোৱাৰে ৷ এনে সিদ্ধান্ত ল’লে কাৰ্বি পাহাৰত জুই জ্বলিব বুলি তেওঁ স্পষ্ট কৰি দিয়ে ৷
লগতে পঢ়ক:জৈৱ গেছৰ প্ৰসাৰৰ লক্ষ্যৰে তেজপুৰ বিশ্ববিদ্যালয়ৰ ই-কনক্লেভ
