কাৰ্বি আংলঙৰ বিৰোধী আঞ্চলিক ৰাজনৈতিক দলৰ নতুন সমীকৰণ

বিজেপিৰ বিৰুদ্ধে যুঁজ দিবলৈ ঐক্যবদ্ধ হ'ব দুটা আঞ্চলিক ৰাজনৈতিক দল ক্ৰমে এ এছ ডি চি (ASDC) আৰু এ পি এইছ এল চি (APHLC) ৷ দুয়োটা আঞ্চলিক ৰাজনৈতিক দলৰ সৈতে বিভিন্ন অৰাজনৈতিক সংগঠন আৰু নাৰী শক্তি সমূহে ঐক্যবদ্ধ হোৱাৰ বাবে সংকল্পবদ্ধ হৈছে ।

ডিফু, ২৮ জুলাই :বিজেপি শাসিত দুই পাৰ্বত্য জিলা কাৰ্বি আংলং (Karbi Anglong)আৰু পশ্চিম কাৰ্বি আংলঙত (West Karbi Anglong) বিৰোধী আঞ্চলিক দুই দলৰ মাজত হ'বলৈ গৈ আছে নতুন সমীকৰণ । বিজেপিৰ বিৰুদ্ধে ঐক্যবদ্ধভাৱে যুঁজ দিবলৈ ঐক্যবদ্ধ হ'ব দুটা আঞ্চলিক ৰাজনৈতিক দল ক্ৰমে এ এছ ডি চি (ASDC) আৰু এ পি এইছ এল চি (APHLC) ৷ চন্দ্ৰকান্ত টেৰাঙ নেতৃত্বাধীন স্বায়ত্তৰাজ্য দাবী সমিতি চমুকৈ এ এছ ডি চি (ASDC) আৰু জে আই কাথাৰ নেতৃত্বাধীন অল পাৰ্টী হীলছ লীডাৰ্চ কনফাৰেন্স চমুকৈ এ পি এইছ এল চি (APHLC) অগ্ৰসৰ হৈছে ঐক্যবদ্ধ হোৱাৰ দিশে ৷

বুধবাৰে ডিফুত দুয়োটা দলে আয়োজিত কৰা এক সংবাদমেলত এই কথা ঘোষণা কৰে নেতাসকলে ৷ এই সন্দৰ্ভত এ এছ ডি চি (ASDC) দলৰ সভাপতি চন্দ্ৰকান্ত তেৰাঙে কয় যে, সময়,পৰিস্থিতি আৰু ৰাইজৰ দাবীত দল দুটাই একত্ৰিত হোৱাৰ দিশে অগ্ৰসৰ হোৱাৰ সিদ্ধান্ত গ্ৰহণ কৰিছে ৷ পাহাৰীয়া জিলা দুখনত আঞ্চলিক শক্তিসমূহ একত্ৰিত হৈ যুঁজ দিয়াটো ৰাইজে বিচাৰিছে বাবেই তেনে দাবীৰ প্ৰতি সন্মান জনাই দল দুটাৰ মাজত একত্ৰিকৰণৰ প্ৰক্ৰিয়া আৰম্ভ হোৱা বুলি কয় সভাপতি গৰাকীয়ে ৷

সোমবাৰে দুয়োটা দলৰ মাজত হোৱা দীৰ্ঘ আলোচনাৰ সৰ্বসন্মত সিদ্ধান্ত মৰ্মে জিলা দুখনৰ মূল দাবী সন্দৰ্ভত ঐক্যবদ্ধভাৱে কাম কৰাৰ বাবে সিদ্ধান্ত গ্ৰহণ কৰিছে বুলি কয় নেতাগৰাকীয়ে ৷

আনহাতে এ এছ ডি চি দলে সংগ্ৰামৰ জৰিয়তে লাভ কৰা ক্ষমতাসমূহ, ষষ্ঠ অনুসূচীৰ ক্ষমতা কংগ্ৰেছ আৰু বিজেপিৰ শাসন কালত হ্ৰাস পোৱাৰ অভিযোগ কৰে নেতাগৰাকীয়ে ৷ বিগত ৭ বছৰে বিজেপি শাসনত থকাৰ পিছতে স্বায়ত্ত ৰাজ্যৰ দাবী ৰূপায়ণ ব্যৱস্থাৰ কথা ভাবিব নোৱাৰিলে বুলি মন্তব্য কৰে ৷ দুয়োটা আঞ্চলিক ৰাজনৈতিক দলৰ সৈতে বিভিন্ন অৰাজনৈতিক সংগঠন আৰু নাৰী শক্তি সমূহে ঐক্যবদ্ধ হোৱাৰ বাবে সংকল্পবদ্ধ হৈছে বুলিও কয় নেতাগৰাকীয়ে ৷ ইয়াৰ বাবে এক উমৈহতীয়া মঞ্চ গঢ়ি তোলা হ'ব যদিও ইয়াৰ নাম আৰু অনান্য বিষয় সমূহ এতিয়ালৈকে নিশ্চিত কৰা হোৱা নাই বুলি জনায় চন্দ্ৰকান্ত তেৰাঙে ৷

অহা ৯ আগষ্টত ডিফু ক্লাৱত অনুষ্ঠিত হ'বলগীয়া আন্তঃৰাষ্ট্ৰীয় খিলঞ্জীয়া দিৱসৰ (International day of Indigenous Peoples) দিনা দুয়োটা দল ঐক্যবদ্ধ হ'ব বুলি জানিবলৈ দিয়ে সভাপতি গৰাকীয়ে ৷ সংবাদমেলত এ.পি.এইছ.এল.চিৰ সভাপতি অৱসৰ প্ৰাপ্ত আই.এ.এছ বিষয়া জে আই কাথাৰো উপস্থিত থাকে ৷

লগতে পঢ়ক :দুৰ্বৃত্তই ভাঙিলে জাতিৰ পিতাৰ প্ৰতিমূৰ্তি