দক্ষিণ কামৰূপৰ বাটৰহাটত ভয়ংকৰ পথ দুৰ্ঘটনা: দুৰ্ঘটনাত ২জন নিহত , আহত এজন

দক্ষিণ কামৰূপৰ বিজয়নগৰ বাটৰহাটত ভয়ংকৰ পথ দুৰ্ঘটনা নিহত ২,আহত ১ । ৩দিনত দক্ষিণ কামৰূপৰ ভিন্ন প্ৰান্তত পথ দুৰ্ঘটনাত প্ৰাণ হেৰুৱালে প্ৰায় ১০জন লোকে আহত প্ৰায় ৭জন ।

দক্ষিণ কামৰূপ, 21 অক্টোবৰ : ৰাজ্যত সঘনাই সংঘটিত হৈ আহিছে পথ দুৰ্ঘটনা । ৰাজ্যৰ বিভিন্ন স্থানত সংঘটিত পথ দুৰ্ঘটনাত বহুতো লোক নিহত হোৱাৰ লগতে আহত হৈছে বহু লোক । সোমবাৰে পুনৰ দক্ষিণ কামৰূপৰ বিজয়নগৰ বাটৰহাটত সংঘটিত পথ দুৰ্ঘটনাত ২ জন লোকে প্ৰাণ হেৰুৱাৰ লগতে আহত হয় এজন । গুৱাহাটী-গোৱালপাৰা সংযোগী ১৭ নং ৰাষ্ট্ৰীয় ঘাইপথত বাটৰহাতৰ ৰিলায়েঞ্চ প্ৰেট্ৰ'ল পাম্পৰ সন্মুখত পালচাৰ বাইক আৰু চাইকেলৰ মাজত সংঘটিত হয় এই পথ দুৰ্ঘটনা । মিৰ্জাৰ পৰা ছয়গাঁও অভিমুখে গৈ থকা AS-25-N-8967 নম্বৰৰ পালচাৰ বাইকখনে তীব্ৰবেগেৰে আহি এখন বাচন বিক্ৰী কৰা চাইকেলত খুণ্ডা মাৰে ফলত থিতাতে নিহত হয় বাইকচালকজনৰ লগতে চাইকেলৰ গৰাকী ৷ আনহাতে দুৰ্ঘটনাটোত আহত হয় বাইকত লগত উঠি অহা যুৱকজন ৷ নিহত বাইক চালকজনৰ নাম ৰাহুল নাথ বুলি জানিব পৰাৰ বিপৰীতে বৰ্তমানেও চাইকেলৰ গৰাকীৰ পৰিচয় জানিব পৰা হোৱা নাই ৷ আহত যুৱকজন বৰ্তমান চিকিৎসাধীন অৱস্থাত ।

আনহাতে ১৯ অক্টোবৰত দক্ষিণ কামৰূপ মিৰ্জা বৰকুছিত সংঘটিত পথ দুৰ্ঘটনাত নিহত হৈছিল ৪ জনকৈ লোক লগতে আহত ১জন । একেদৰে দক্ষিণ কামৰূপৰ বকো বামুণীগাঁৱত দেওবাৰে নিশা সংঘটিত হোৱা পথ দুৰ্ঘটনাত চাৰিগৰাকী মহিলা নিহত হোৱাৰ লগতে দুৰ্ঘটনাটোত আহত হয় ৪ জন । উল্লেখযোগ্য যে যোৱা ৩ দিনত দক্ষিণ কামৰূপৰ ভিন্ন ঠাইত পৃথকে পৃথকে সংঘটিত এই পথ দুৰ্ঘটনাকেইটাত প্ৰাপ্ত তথ্য অনুসৰি ১০ জনকৈ লোক নিহত হোৱাৰ লগতে বৰ্তমানেও চিকিৎসাধীন হৈ আছে ৭ জনকৈ লোক ।