ছয়গাঁও,18 অক্টোবৰ: শুকুৰবাৰে কামৰূপ আৰক্ষীৰ বৃহৎ সফলতা ৷ বিয়লি ছয়গাঁও গুমি পথত ব্ৰাউন চুগাৰসহ আটক এজন যুৱক ৷ আৰক্ষীৰ হাতত গ্ৰেপ্তাৰ হোৱা যুৱকজন হ’ল দৰং জিলাৰ দলগাঁৱৰ চাইফুদ্দিন ওৰফে চাহাবুদ্দিন ৷ জানিব পৰা মতে,উক্ত যুৱকজনে প্ৰায় এক কিলোগ্ৰাম ব্ৰাউন চুগাৰলৈ শুকুৰবাৰে বিয়লি ছয়গাঁৱত উপস্থিত হোৱাৰ খবৰ লাভ কৰিছিল কামৰূপ আৰক্ষীয়ে ৷
এই গোপন তথ্যৰ ভিত্তিতে কামৰূপ জিলাৰ উপ আৰক্ষী অধীক্ষক কল্যাণ পাঠকৰ নেতৃত্বত তথা ছয়গাঁও আৰু বকো আৰক্ষীৰ সহযোগত ছয়গাঁৱত গোপনে প্ৰায় চাৰিঘণ্টা ধৰি চলোৱা অভিযানৰ অন্তত যুৱকজনক ছয়গাঁও গুমি পথৰ এখন চাহ দোকানৰ সন্মুখত গ্ৰেপ্তাৰ কৰিবলৈ সক্ষম হয় ৷
গ্ৰেপ্তাৰ হোৱা যুৱকজন বিখ্যাত ড্ৰাগছ সৰবৰাহী চক্ৰৰ লগত জড়িত থকা বুলি সন্দেহ প্ৰকাশ কৰিছে আৰক্ষীয়ে ৷ আৰক্ষীয়ে মাৰাথন জেৰা অব্যাহত ৰাখিছে যুৱকজনক ৷ আনহাতে যুৱকজনৰ পৰা আৰক্ষীয়ে বহু সংখ্যক নথি পত্ৰও জব্দ কৰিবলৈ সক্ষম হয় ৷
