বকো,29 নৱেম্বৰ : ৰাজ্যৰ ভিন্ন প্ৰান্তত আৰম্ভ হৈছে পৰম্পৰাগত শ্ৰীকৃষ্ণৰ ৰাস মহোৎসৱ ৷ শনিবাৰৰ পৰা বকোৰ নগৰবেৰাতো আৰম্ভ হৈছে 88 সংখ্যক আঞ্চলিক ৰাস মহোৎসৱ । 5 দিনীয়া ধৰ্মীয় কাৰ্যসূচীৰে উদযাপন কৰা হ’ব নগৰবেৰাৰ ৰাস মহোৎসৱ । কিন্তু কৰ’ণা মহামাৰীৰ বাবে এইবাৰ ৰাসত নাথাকিব পূৰ্বৰ দৰে উছাহ-উদ্দীপনা । এইবাৰ দেখা পোৱা নাযাব সাংস্কৃতিক সন্ধিয়াৰ আনন্দ উল্লাস ।
নগৰবেৰাৰ বিশিষ্ট সমাজ কৰ্মী তথা অৱসৰপ্ৰাপ্ত শিক্ষক মদন পাঠকে মহোৎসৱৰ দ্বাৰ মুকলি কৰাৰ পাচতে ৰাস মহোৎসৱৰ সভাপতি শ্যামাচৰণ ঠাকুৰীয়াই ধৰ্মধ্বজা উত্তোলন কৰি ঐতিহ্যমণ্ডিত নগৰবেৰা ৰাস মহোৎসৱৰ শুভাৰম্ভণি কৰে । আধ্যাত্মিকতাৰ ওপৰত গুৰুত্ব আৰোপ কৰি উদযাপন কৰা হ’ব নগৰবেৰা ৰাস মহোৎসৱ ।