মিৰ্জা, 20 ডিচেম্বৰ : অসম চৰকাৰৰ সাংস্কৃতিক পৰিক্ৰমা বিভাগৰ জৰিয়তে ৰাজ্যৰ বিভিন্ন পঞ্চায়তত গ্ৰহণ কৰা হৈছে 'ডিজিটেল লাইব্ৰেৰী' স্থাপনৰ আঁচনি ৷ এই আঁচনিৰ অংশস্বৰূপে মঙলবাৰে ছয়গাঁও বিধানসভা সমষ্টিৰ অন্তৰ্গত কেইবাটাও পঞ্চায়তত ডিজিটেল লাইব্ৰেৰীৰ আধাৰশিলা স্থাপন কৰে বিধায়ক ৰেকিবুদ্দিন আহমেদে।
সমষ্টিটোৰ অন্তৰ্গত চম্পক নগৰ গাঁও পঞ্চায়তৰ ছয়গাঁও চম্পকনগৰ ছোৱালী হাইস্কুল প্ৰাংগনত মঙলবাৰে বিধায়ক ৰেকিবুদ্দিন আহমেদে এটা ডিডিটেল লাইব্ৰেৰীৰ আধাৰশিলা স্থাপন কৰে। 16 লাখ টকা ব্যয় সাপেক্ষে নিৰ্মাণ কৰিবলগীয়া 'ডিজিটেল লাইব্ৰেৰী'ত অত্যাধুনিক সকলো সুবিধা লাভ কৰিব ছাত্ৰ-ছাত্ৰীয়ে। এই অনুষ্ঠানৰ লগত সংগতি ৰাখি বিদ্যালয় চৌহদত এখন মুকলি সভা অনুষ্ঠিত হয় ।
এই সভাত মুখ্য অতিথি হিচাপে উপস্থিত থাকি ছয়গাঁও সমষ্টিৰ স্থানীয় বিধায়ক ৰেকিবুদ্দিন আহমেদে ভাষণ প্ৰসংগত কয় যে, ছয়গাঁও সমষ্টিৰ তিনিটা ব্লকৰ 19 টা পঞ্চায়ততে 19 টা প্ৰকল্প স্থাপন কৰা হ’ব । প্ৰথম প্ৰকল্পটো আধাৰশিলা ছয়গাঁও চম্পক নগৰ ছোৱালী হাইস্কুলত শুভাৰম্ভ কৰা হৈছে ।