আজাৰা, 24 জুলাই: প্ৰলয়ংকাৰী বানত বিধ্বস্ত ৰাজ্যৰ বিস্তীৰ্ণ অঞ্চল ৷ বানৰ সময়ত যিদৰে ৰাইজে জীয়াতু ভুগিছে, সেইদৰে পানী শুকুৱাৰ পিছতো জটিল পৰিস্থিতিৰ সন্মুখীন হ'বলগীয়া হৈছে বন্যাৰ্ত ৷ বানাক্ৰান্ত সকলে কিছু সকাহ পাইছে যদিও দূৰ হোৱা নাই সমস্যা ৷ ঘৰ-বাৰী, বাট-পথ, দলঙ আদিবোৰ বুৰ যোৱাৰ লগতে বিধ্বংসী বানে গ্ৰাস কৰিছে খেতি-বাতিৰ লগতে বিস্তীৰ্ণ কৃষিভূমি ৷ সম্প্ৰতি বানত সৰ্বহাৰা হৈ পৰিছে কৃষকসকল ৷
এই দৃশ্য মহানগৰীৰ ধাৰাপুৰৰ সমীপৰ মাজিৰিগাঁৱৰ ৷ মাজিৰিগাঁৱত কেইবাবিঘা কৃষিভূমিত অমিতা, কল, তামোল আদিৰ খেতি কৰিছিল কৃষকে, কিন্তু বলীয়া বানত ধ্বংস হ'ল সকলো ৷ যাৰফলত এতিয়া দিশহাৰা হৈ পৰিছে কৃষকসকল ৷ মাজিৰিগাঁৱৰ দুজন কৃষক পিংকু কলিতা আৰু ৰুবুল কটকী ৷ কেইবাবিঘা মাটিত ডেৰলক্ষাধিক টকা ব্যয় সাপেক্ষে কৰা খেতি বানত ধ্বংস হোৱাত এতিয়া মুৰে-কপালে হাত দিছে এই দুজন কৃষকে ৷
বানত নিজৰ সকলো হেৰুৱাই শোকত ভাগি পৰিছে কৃষককেইজন । চৰকাৰে এইক্ষেত্ৰত সহায়ৰ হাত আগবঢ়ালে কিছু সকাহ পাব বুলি সংবাদ মাধ্যমৰ আগত ব্যক্ত কৰে কৃষককেইজনে ৷