কামৰূপ জিলা উপায়ুক্ত কাৰ্যালয়ত অসমীয়া ভাষাক অৱমাননা

অসমৰ মুখ্যমন্ত্ৰী ড৹ হিমন্ত বিশ্ব শৰ্মাৰ নেতৃত্বাধীন চৰকাৰখনে জাতীয় সংগীতেৰে চৰকাৰী কাৰ্যসূচী মুকলি কৰিব বিচাৰিছে সেই সময়তে মুখ্যমন্ত্ৰীৰ সমষ্টিতে অসমীয়া ভাষাক চূড়ান্ত অপমান কৰাক লৈ তীব্ৰ প্ৰতিক্ৰিয়াৰ সৃষ্টি হৈছে ৷

বাইহাটা, 11 জুলাই : কামৰূপ জিলা (KAMRUP DISTRICT) উপায়ুক্ত কাৰ্যালয়ৰ নাম ফলক অসমীয়াত নিলিখাৰ বাবে প্ৰতিক্ৰিয়া প্ৰকাশ কৰিছে উত্তৰ গুৱাহাটী সাহিত্য সভা আৰু সদৌ অসম ছাত্ৰ সন্থাই (ALL ASSAM STUDENT UNION) ৷ যি সময়ত অসমৰ মুখ্যমন্ত্ৰী ড৹ হিমন্ত বিশ্ব শৰ্মাৰ নেতৃত্বাধীন চৰকাৰখনে জাতীয় সংগীতেৰে চৰকাৰী কাৰ্যসূচী মুকলি কৰিব বিচাৰিছে সেই সময়তে মুখ্যমন্ত্ৰীৰ সমষ্টিতে অসমীয়া ভাষাক চূড়ান্ত অপমান কৰাক লৈ তীব্ৰ প্ৰতিক্ৰিয়াৰ সৃষ্টি হৈছে ৷

উক্ত ঘটনাটোৰ পাচেত কামৰূপ জিলা উপায়ুক্তৰ বিৰুদ্ধে গৰজি উঠিছে বিভিন্ন দল সংগঠন ৷ সম্প্ৰতি কামৰূপ জিলা উপায়ুক্ত কাৰ্যালয়ৰ নাম ফলক অসমীয়াত নিলিখাৰ বাবে জিলাখনত ব্যাপক প্ৰতিক্ৰিয়া সৃষ্টি হোৱা দেখা গৈছে । উল্লেখযোগ্য যে, কামৰূপ জিলা উপায়ুক্ত কাৰ্যালয়টো উত্তৰ পূৱৰ ভিতৰতে প্ৰথমটো সংহত উপায়ুক্ত কাৰ্যালয় হিচাপে গঢ় দিয়া হৈছিল ।

কিন্ত অতি দুৰ্ভাগ্যজনকভাৱে উপায়ুক্ত কাৰ্যালয়টোৰ নামফলক খন অসমীয়াত লিখাৰ পৰিৱৰ্তে ইংৰাজীতে ‘INTEGRATED DISTRICT OFFICE’ হিচাপে লিখা হৈছে । যাৰ বাবে সদৌ অসম ছাত্ৰ সন্থা আৰু উত্তৰ গুৱাহাটী সাহিত্য সভাই তীব্ৰ ক্ষোভ প্ৰকাশ কৰা দেখা গৈছে ।

তাৰ পাচতে জাতীয় সংগঠন দুটাই উপায়ুক্ত কাৰ্যালয়ৰ নামফলকখন অসমীয়াত লিখাৰ বাবে জিলা উপায়ুক্ত কৈলাশ কাৰ্তিকক দাবী জনাইছে । উত্তৰ গুৱাহাটী সাহিত্য সভাৰ সম্পাদক মধুসূধন মেধিয়ে নামফলকখন অসমীয়াত নিলিখাৰ বিষয়টো অসমীয়া ভাষাৰ প্ৰতি চূড়ান্ত অপমান বুলি মতপোষণ কৰিছে । উপায়ুক্তগৰাকীক উপায়ুক্ত কাৰ্যালয়টোৰ নামফলকখন শীঘ্ৰেই অসমীয়া ভাষাত সংহত উপায়ুক্ত কাৰ্যালয় হিচাপে লিখাৰ বাবে দাবী জনোৱা পৰিলক্ষিত হৈছে ।

লগতে উপায়ুক্ত কাৰ্যালয়টোত সংলগ্ন প্ৰতিটো কাৰ্যালয়ৰ নামো অসমীয়াত লিখাৰ বাবে উপায়ুক্তগৰাকীক দাবী জনায় সাহিত্য সভাই । আনহাতে, সদৌ অসম ছাত্ৰ সন্থাৰ উপদেষ্টা প্ৰকাশ দাসেও এই ঘটনাক দুৰ্ভাগ্যজনক আখ্যা প্ৰদান কৰি কয় যে, এয়া অসম আৰু অসমীয়াৰ বাবে চুড়ান্ত অপমান । শীঘ্ৰেই এইক্ষেত্ৰত জিলা উপায়ুক্ত গৰাকীয়ে উচিত কাৰ্যব্যৱস্থা গ্ৰহণ নকৰিলে আছুৱে প্ৰতিবাদী কাৰ্যসূচী গ্ৰহণ কৰিব বুলিও মত প্ৰকাশ কৰে।

লগতে পঢ়কঃ অসমত সন্তান জন্ম দি চৰ্চাত এগৰাকী কাৰাবন্দী ৰহিঙীয়া মহিলা