সামাজিক ব্যাধি দূৰীকৰণৰ লক্ষ্যৰে অভি-নীল মেমৰিয়েল ট্ৰাষ্ট গঠন

অভিৰ পিতৃয়ে দোষ প্ৰকাশ কৰি কয় যে যি 19 জন হত্যাকাৰী আৰক্ষীৰ জিম্মাত আছে সেই কেইজনক দেখিলে তেওঁ অনুভৱ কৰে তেওঁলোক অনুতপ্ত নহয়। সময় সুবিধা আৰু সুযোগ পালে সেই হত্যাকাৰী কেইজনে পুনৰ একে ঘটনা সংঘটিত কৰিবলৈ কুণ্ঠাবোধ নকৰিব । গতিকে ঘটনাটোৰ দোষীক উচিত শাস্তি প্ৰদান কৰিবলৈ তেওঁ আহ্বান জনায় ৷

গুৱাহাটী ,28 এপ্ৰিল : অভি নীলৰ স্মৃতিত গঠন হ'ব মেমৰিয়েল ট্ৰাষ্ট ৷ এই ট্ৰাষ্টৰ লক্ষ্য এখন পশু চিকিৎসালয়, আৰ্ট আৰু মিউজিকৰ ওপৰত কাম কৰা ৷

অভি নীলক হয়তো এতিয়াও পাহৰি যোৱা নাই ৰাজ্যবাসীয়ে । অসমৰ বিভিন্ন জাতি জনগোষ্ঠীৰ একতাত ক’লা অধ্যায় হিচাপে থাকি যাব অভি-নীলৰ হত্যাৰ ঘটনা ৷ কাৰ্বিআংলংত 2018 বৰ্ষৰ জুনৰ 8 তাৰিখে গণ প্ৰহাৰত নিহত হৈছিল দুই যুৱক অভি আৰু নীল । ঘটনাটোৰ এটা বছৰ সম্পূ্ৰ্ণ হ'বলৈ প্ৰায় এমাহ বাকী থকা অৱস্থাতো এতিয়ালৈ ঘটনাটোত জড়িত থকা আটাইকেইজন অভিযুক্তক আটক কৰিবলৈ সক্ষম হোৱা নাই অসম আৰক্ষী ৷ মুঠ 48 জন অভিযুক্তৰ এতিয়ালৈ চিনাক্ত হৈছে 19 জন ৷ নীলৰ পিতৃ গোপাল চন্দ্ৰ দাসে জানিবলৈ দিয়া মতে 5 জন প্ৰত্যক্ষদৰ্শীয়ে সাক্ষ্য প্ৰদান কৰাৰ ভিত্তিত এই 19 জনক আৰক্ষীয়ে কৰায়ত্ত কৰিবলৈ সক্ষম হৈছে। অভি নীলৰ বিচাৰ প্ৰক্ৰিয়া বৰ্তমান সাক্ষ্য দানৰ পৰ্যায়ত আছে । মুঠ 48 গৰাকী হত্যাকাৰীৰ 19 জনক হে 15 জন সাক্ষীৰ পৰা সাক্ষ্য লৈ কৰায়ত্ত কৰিছে আৰক্ষীয়ে ।

আনহাতে পুত্ৰৰ স্মৃতিত অভি নীল মেমৰিয়েল ট্ৰাষ্ট গঠনৰ কাম হাতত লৈছে পৰিয়ালবৰ্গই । এখন পশু চিকিৎসালয় নিৰ্মাণ আৰু আৰ্ট আৰু মিউজিকৰ ওপৰত কাম কৰাৰ লক্ষ্যৰে গঠন কৰা হৈছে এই মেমৰিয়েল ট্ৰাষ্ট ।