গুৱাহাটী,২৫ মার্চ: নিৰ্বাচনৰ প্ৰাকক্ষণত বৃহস্পতিবাৰে গুৱাহাটী প্ৰেছ ক্লাবত ভোটাৰ্ছ পাৰ্টী ইণ্টাৰনেশ্যনেলে এক সংবাদমেল সম্বােধন কৰে । সংবাদমেলতে দলটোৰ অখিল ভাৰতীয় সভানেত্রী ববিতা শর্মা গােয়েলে ৰজিত শর্মাক দলৰ অখিল ভাৰতীয় সমিতিৰ সচিব হিচাপে ঘােষণা কৰে ।
নির্বাচনী প্রচাৰৰ সময়ত বিভিন্ন দলে ৫-১০ লাখ নিবনুৱাক নিযুক্তি দিব বুলি দিয়া প্রতিশ্রুতিৰ সমালোচনা কৰে । ৰে'ল ষ্টেছন, বিমানবন্দৰ, বেংক, কয়লাখনি পুঁজিপতিসকলৰ হাতত গতাই দিয়াৰ প্ৰসংগ উত্থাপন কৰি চৰকাৰক উদ্দেশ্যি আক্ৰমণাত্মক মন্তব্য কৰে । তেওঁ কয় যে, কৃষি আইন আনি লাহেকৈ কৃষি বিভাগাে ব্যক্তিগত খণ্ডক গতাই দিব ।
তেওঁ কয় যে, বিভাগবোৰ চৰকাৰে নাইকিয়া কৰিলে । এতিয়া যুৱ প্রজন্মক এই পুঁজিপতিসকলৰ ঘৰত নিযুক্তি দিব নেকি বুলি তেওঁ প্ৰশ্ন কৰে । সম্প্ৰতি বিভিন্ন ৰাজনৈতিক দলে দিয়া বিভিন্ন প্ৰতিশ্ৰুতি সন্দৰ্ভত নেত্ৰীগৰাকীয়ে তীব্ৰ কটাক্ষ কৰি ভোটাৰ ৰাইজক বিবেক ভোট প্ৰদান কৰিবলৈ আহ্বান জনায় ।
উল্লেখ্য যে, এইবাৰ বিধানসভা নিৰ্বাচনত ভোটাৰ্ছ পাৰ্টী ইণ্টাৰনেশ্যনেলে মুঠ ২৮ টা সমষ্টিত প্ৰতিদ্বন্দ্বিতা আগবঢ়াব । বৃহস্পতিবাৰৰ এই সংবাদমেলত দলটোৰ নেতা ৰঞ্জিত শর্মা, সূৰজ কুমাৰ গােয়েল, শিৱ নাৰায়ণ শর্মা, ক্রান্তিবীৰ চনিকা, নবীন কুমাৰ উপস্থিত আছিল ।
লগতে পঢ়ক: অন্তিম দিনৰ প্ৰচাৰত ব্যস্ত মিত্ৰজোঁটৰ প্ৰাৰ্থী কেশৱ মহন্ত
