1 বজাৰ শীৰ্ষ দহটা বাতৰি

1 বজাৰ শীৰ্ষ দহটা বাতৰি

হোজাইত অপৰিৱৰ্তিত বান পৰিস্থিতি ৷ জিলাখনত কপিলী নৈৰ বাঢ়নী পানীয়ে নতুনকৈ বিভিন্ন অঞ্চল বুৰাই পেলোৱাৰ ফলত সৃষ্টি হৈছে অবৰ্ণনীয় পৰিস্থিতি ৷ জিলাখনৰ ঠেপলাগুৰি, কোমোৰাকটা, ৰাইকাটা, নোভাঙা, হাতিমৰা আদি অঞ্চল কপিলীৰ বানে বুৰাই পেলাইছে ৷

কামৰূপ(গ্ৰাম্য) জিলাৰ ভিন্ন প্ৰান্তত তাণ্ডৱ সৃষ্টি কৰিছে বাঢ়নী পানীয়ে ৷ জিলাখনৰ মাজেৰে বৈ যোৱা পুঠিমাৰী নদীৰ বাঢ়নী পানীয়ে প্ৰতিবছৰে সংহাৰী ৰূপ ধাৰণ কৰাৰ ফলত বিপদৰ সন্মুখীন হয় জন সাধাৰণৰ লগতে পশুধনসমূহ ৷

আমগুৰি সমষ্টিৰ আলিমূৰ,বৰগাঁও,পুৰণিগুডাম, তেলিয়াডোঙা, ৰূপহীমুখ মিছিং গাঁও,ৰূপহীমুখ কুমাৰ গাঁও,স'ৰাগুৰি চাপৰিৰ বিস্তীৰ্ণ অঞ্চল ইতিমধ্যে বানৰ কবলত ৷ ইয়াৰ মাজতে, শিৱসাগৰ জিলা সদৌ অসম ছাত্ৰ সন্থাৰ এটি দলে বানবিধ্বস্ত অঞ্চলসমূহ পৰিদৰ্শন কৰে ৷

টিংখাঙৰ লেঙেৰীত সংগ্ৰামী নেতা অখিল গগৈ সহিত ধৈৰ্য কোঁৱৰ, বিতু সোণোৱালৰ উন্নত চিকিৎসা আৰু মুক্তিৰ দাবীত নামঘৰত প্ৰাৰ্থনাৰ লগতে ভাগৱত পাঠ কৰে ৰাইজে ৷

মৰিয়নীত চিকিৎসকৰ বাসগৃহত হোম কোৱাৰেণ্টাইনৰ ষ্টিকাৰ লগাবলৈ গৈ চিকিৎসক আৰু তেওঁৰ আত্মীয়ৰ পৰা ভাবুকি লাভ কৰে এগৰাকী আশা কৰ্মীয়ে ৷ চিকিৎসক গৰাকীৰ ভাবুকি আৰু নিৰ্দেশ অনুসাৰে আশা কৰ্মী গৰাকীয়ে তেওঁৰ হোম কোৱাৰেণ্টাইনৰ সময় নিৰ্ধাৰিত সময়তলৈ হ্ৰাস কৰে ৷

কেন্দ্ৰীয় গৃহমন্ত্ৰী অমিত শ্বাহে, কেন্দ্ৰীয় সশস্ত্ৰ বাহিনীয়ে আয়োজন কৰা সৰ্বভাৰতীয় বৃক্ষৰোপন কাৰ্যসূচীত অংশগ্ৰহণ কৰিব ৷ গৃহমন্ত্ৰীগৰাকীয়ে কেন্দ্ৰীয় সংৰক্ষিত আৰক্ষী বাহিনীৰ গুৰুগ্ৰামস্থিত গ্ৰুপ চেন্টাৰত এই কাৰ্যসূচী উদ্বোধন কৰাৰ লগতে বাকী পাঁচটা অৰ্ধসামৰিক বাহিনীৰ সৈতেও এই কাৰ্যসূচীত অংশগ্ৰহণ কৰিব ৷

শেহতীয়াকৈ যথেষ্ট ভাইৰেল হৈছে নানাৱতী হাস্পতালৰ পৰা বিগ বি বচ্চনৰ এটা বিশেষ ভিডিঅ' ৷ য'ত মেগাষ্টাৰ গৰাকীয়ে নানাৱতী হাস্পতালৰ প্ৰত্যেকজন স্বাস্থ্যকৰ্মীক কৃতজ্ঞতা জনাইছে ৷ লগতে এই মহামাৰীৰ সৈতে সমুখ সমৰত যুঁজ দি থকা প্ৰত্যেকজন স্বাস্থ্যকৰ্মীক ভগৱান আখ্যা দিছে অভিনেতাগৰাকীয়ে ৷

বলীউডৰ প্ৰসিদ্ধ অভিনেত্ৰী ৰেখাৰ আৱাসগৃহৰ এজন নিৰপত্তাৰক্ষীৰ শৰীৰত কৰ'ণা ভাইৰাছৰ অৱস্থিতি পোৱাৰ পাছতেই ছিল কৰি দিয়া হয় তেওঁৰ বাসগৃহটো ৷

বিশ্ব গীৰ্জা সংস্থা (The World Council of Churches')ৰ অন্তৱৰ্তী মহাসচিব লন চাউকাই বিশ্বখ্যাত আগিয়া ছোফিয়াক সংগ্ৰহালয়ৰ পৰা মছজিদলৈ ৰূপান্তৰ কৰাত প্ৰতিক্ৰিয়া ব্যক্ত কৰিছে ৷

আগিয়া ছোফিয়াক মছজিদলৈ ৰূপান্তৰ কৰি সমগ্ৰ বিশ্ববাসীৰে সমালোচনাৰ সন্মুখীন হ'লেও নিজ দেশৰ লগতে বিশ্বৰ অন্য প্ৰান্তৰ কঠোৰপন্ঠী মুছলমানৰ সমৰ্থন আদায় কৰিবলৈ সক্ষম হৈছে তুৰ্কীৰ ৰাষ্ট্ৰপতি ৰেকেপ টায়েপ এৰ্ডোগানে ৷ অৱশ্যে এৰ্ডোগানৰ ইছলাম বিশ্বযাত্ৰাত ছৌদিয়ে মুল বাধা হিচাপে এতিয়াও ঠিয় হৈ আছে ৷