বিয়লি 3 বজাৰ দহটা শীৰ্ষ বাতৰি

বিয়লি 3 বজাৰ দহটা শীৰ্ষ বাতৰি

নগাঁও জিলাৰ পুৰণিগুদাম হাতীগাঁৱৰ নিবাসী তিলক দাস নামৰ যুৱকজনে কৰ্মৰ সন্ধানত হায়দৰাবাদলৈ গৈ কৰ'ণাত আক্ৰান্ত হয় ৷ হায়দৰাবাদত থকা চৰকাৰী ক‘ভিড কেয়াৰ চেন্টাৰত ক‘ভিড সংক্ৰমিত ৰোগীৰ বাবে থকা ঠাইৰ যথেষ্ট অভাৱ হোৱাত এখন নাৰ্চিং হোমত যুৱকজনক ভৰ্তি কৰায় যদিও চিকিৎসা প্ৰদানৰ ক্ষেত্ৰত যথেষ্ট আৰ্থিক সংকটে দেখা দিছে ৷ সেয়েহে যুৱকজনৰ চিকিৎসাৰ বাবে পৰিয়ালৰ লোকে সহায় বিচাৰিছে সদাশয় লোকৰ ৷

তিনিচুকীয়া জিলাৰ জাগুনৰ কথাকাঠনিত মঙলবাৰে পুৱাৰ ভাগত সংঘটিত হয় এক গ্ৰেনেড বিস্ফোৰণ কাণ্ড ৷ বিস্ফোৰণত থিতাতে এজন 12 বছৰীয়া কিশোৰ নিহত হোৱাৰ লগতে আহত হয় এজন যুৱক ৷ নিহত কিশোৰজনৰ নাম সুৰজ হাজং বুলি জানিব পৰা গৈছে ৷

মুখ্যমন্ত্ৰী হিচাপে দায়িত্বভাৰ লোৱাৰ পাচত মঙলবাৰে পুৱাৰ ভাগতে গুৱাহাটীস্থিত ৰাজ্যিক বিজেপি কাৰ্যালয়ত উপস্থিত হয় ড৹ হিমন্ত বিশ্ব শৰ্মা ৷ দলীয় কাৰ্যালয়ত উপস্থিত হৈ দলীয় নেতা-কৰ্মীসকলক সাক্ষাৎ কৰে নৱ নিযুক্ত মুখ্যমন্ত্ৰীগৰাকীয়ে । লগতে তেওঁ বিজেপিৰ নেতা-কৰ্মীৰ সৈতে এক আলোচনাত মিলিত হয় ।

ক'ভিড ৰোগীৰ বাবে সাজু কৰি তুলা হৈছে জাগীৰোডস্থিত নগাঁও কাগজ কলৰ ক’ভিড চিকিৎসালয় ৷ বৰ্তমান চিকিৎসালয়খনত 60 খন বিচনাৰ লগতে প্ৰতিখন বিচনাৰ লগতে অক্সিজেনৰ চিলিণ্ডাৰৰো সু-ব্যবস্থাও কৰা হৈছে ৷

জোনাইত সোমবাৰে নিশা সংঘটিত হয় এক গুলীয়াগুলিৰ ঘটনা ৷ জোনাই মহকুমাৰ অন্তৰ্গত 1 নং চিৰামপুৰীয়া গাঁৱৰ নিৱাসী সুভাষ চাহু নামৰ ব্যৱসায়ীজনৰ ওপৰত চাৰিজনীয়া অচিনাকি দুৰ্বৃত্তৰ দলে গুলিচালনা কৰা বুলি জানিব পৰা গৈছে ৷

ডুমডুমা চহৰৰ বিবেকানন্দ পথৰ মনোৰঞ্জন সূৰ ফলতত্ৰধৰ নামৰ 60 বছৰীয়া লোকজন ক'ভিড আক্ৰান্ত হোৱা লোকজনৰ অৱস্থা অতি সংকটজনক হোৱাত জীয়ৰীয়ে ফোন যোগে ১০৮ এম্বুলেঞ্চ মাতি পঠিয়ায় ৷ কিন্তু পিপিই কিট পৰিধান কৰি অহা স্বাস্থ্যকৰ্মী কেইগৰাকীয়ে লোকজনক স্থানীয় ৰাইজক দাঙি আনিবলৈ কোৱাত হতভম্ব হৈ পৰে স্থানীয় লোকসকল ৷

সোমবাৰে নিশা অসমৰ জনপ্ৰিয় কবি পল শেনছোৱাৰ ডিব্ৰুগড়ৰ এখন চিকিৎসালয়ত মৃত্যু হয় । জনপ্ৰিয় কবি প্ৰেংকাইটিছত আক্ৰান্ত হৈ অকাল মৃত্যুক সাৱটি লয় পল শেনছোৱাই ৷

দেশৰ অন্যতম সৰ্ববৃহৎ দুগ্ধজাত কোম্পানী আমুলৰ প’ষ্টাৰত মুখ্যমন্ত্ৰী ড৹ হিমন্ত বিশ্ব শৰ্মাৰ প্ৰতিচ্ছবি সৃদৃশ কাৰ্টুন ৷ মুখ্যমন্ত্ৰী ড৹ হিমন্ত বিশ্ব শৰ্মাৰ টুইটযোগে কাৰ্টুন প’ষ্টাৰ শ্বেয়াৰ কৰি তেওঁৰ ওপৰত বিশ্বাস কৰিবলৈ আহ্বান জনায় আমুল কোম্পানীয়ে ৷

ক'ভিড মহামীৰৰে যুঁজ দিয়াৰ ক্ষেত্ৰত ত্ৰিপুৰা চৰকাৰলৈ সহায়ৰ হাত আগবঢ়াইছে উত্তৰ-পূব সীমান্ত ৰে'লৱেই । আগৰতলা ৰে'ল ষ্টেচনত ৰে'লৰ দবাত ২০০ খন বিচনা সাজু কৰা হৈছে ক'ভিড ৰোগীৰ বাবে । ৰাষ্ট্ৰীয় স্বাস্থ্য অভিযানৰ ত্ৰিপুৰাৰ সঞ্চালক সিদ্ধাৰ্থ শিৱ জৈছৱালে এই কথা প্ৰকাশ কৰিছে ।

দেশৰ ভিন্ন ৰাজ্যৰ লগতে ক'ভিড-১৯ৰ দ্বিতীয়ে ঢৌৱে ভাবুকি আনিছে ত্ৰিপুৰালৈ । যোৱা ২৪ ঘণ্টাত ৰাজ্যখনত নতুনকৈ ১৩৩ জন লোক মহামাৰীৰ কবলত পৰিছে । মাত্ৰ এটা দিনতে কৰ'ণাই প্ৰাণ কাঢ়িলে ত্ৰিপুৰাৰ ৪ জন লোকৰ ।