শিল্পী ৰূপম ভূঞাৰ পত্নীৰ আকস্মিক বিয়োগঃ প্ৰস্তুতি পৰাশৰৰ সমবেদনা জ্ঞাপন

পুত্ৰ সন্তানৰ পিতৃ হোৱাৰ আনন্দৰ কেইমুহুৰ্তমানৰ ভিতৰতে পত্নীক হেৰুৱালে শিল্পী ৰূপম ভূঞাৰ ৷ পত্নীৰ অকাল বিয়োগত মৰ্মাহত হৈ পৰিছে শিল্পীগৰাকী ৰূপম ভূঞা । আকস্মিকভাৱে সংঘটিত এই ঘটনাৰ পিছত এতিয়া অকলশৰীয়া হৈ পৰিছে দুই সন্তানৰ পিতৃ ৰূপম ভূঞা ।

গুৱাহাটী,12 মাৰ্চঃ পত্নীহাৰা হ’ল শিল্পী ৰূপম ভূঞা ৷ বৃহস্পতিবাৰে আকস্মিকভাৱে মৃত্যুক সাৱটি লয় শিল্পীগৰাকীৰ পত্নীয়ে ৷ ৰূপম ভূঞাৰ পত্নী মনশ্ৰী বৰুৱাক প্ৰসৱজনিত কাৰণত বুধবাৰে মহানগৰীৰ এখন চিকিৎসালয়ত ভৰ্তি কৰোৱা হৈছিল ৷ ৰূপম ভূঞাৰ পিতৃয়ে জানিবলৈ দিয়া অনুসৰি, বুধবাৰে দিনৰ 11বজাত এটি পুত্ৰ সন্তান জন্ম দিছিল বোৱাৰী মনশ্ৰীয়ে ।

সন্ধিয়াৰ ভাগলৈ সকলো ঠিকেই আছিল যদিয়ো চিকিৎসকে হঠাৎ মনশ্ৰীক আই চি ইউত ভৰ্তি কৰোৱাৰ কথা কোৱাৰ লগতে হিমগ্ল’বিন আৰু প্ৰেচাৰৰ তাৰতম্যৰ বাবে স্বাস্থ্যৰ অৱনতি ঘটা বুলি জানিবলৈ দিয়ে ৷ ইয়াৰ পিছতে মনশ্ৰীক পৰিয়ালৰ আগত মৃত বুলি ঘোষণা কৰে চিকিৎসকে ৷ ঘটনা সন্দৰ্ভত বৰ্তমানলৈকে চিকিৎসালয় কৰ্তৃপক্ষৰ বিৰুদ্ধে কোনো গোচৰ ৰুজু কৰাৰ কথা ভবা নাই বুলি জানিবলৈ দিয়ে শিল্পীগৰাকীৰ পিতৃয়ে ।

মনশ্ৰী বৰুৱাৰ বিয়োগ

ইপিনে,অসমৰ তত্ত্বগধুৰ আৰু ব্যতিক্ৰমী ধাৰাৰ গীতৰ চৰ্চাৰে সমাদৰ আৰু জনপ্ৰিয়তা অৰ্জন কৰা সংগীত শিল্পীগৰাকীৰ পত্নীৰ অকাল বিয়োগত মৰ্মাহত ৰাজ্যৰ বলিষ্ঠ অভিনেত্ৰী প্ৰস্তুতি পৰাশৰ । অভিনেত্ৰী গৰাকীয়ে ৰূপম ভূঞা আৰু পৰিয়ালৰ প্ৰতি গভীৰ সমবেদনা জ্ঞাপন কৰে ৷ লগতে বিদেহী আত্মাৰ চিৰশান্তিৰ বাবে প্ৰাৰ্থনা জনায় ৷ যদিয়ো কৰুণ ঘটনাটোৰ প্ৰতিক্ৰিয়াৰ ভাষা নাই তথাপি ৰূপম ভূঞাক ঈশ্বৰে সাহস দিয়ক, শক্তি দিয়ক বুলি ডিব্ৰুগড়ত এখন সংবাদমেল সম্বোধন কৰি প্ৰতিক্ৰিয়া প্ৰকাশ কৰে প্ৰস্তুতি পৰাশৰে ।

লগতে চাওকঃদুৰ্লভ সম্পদেৰে ভৰপূৰ শিৱসাগৰৰ দুৰ্লভ বৰাৰ যাদুঘৰটো