গুৱাহাটী,জুলাই 6 : অসমত ৰাষ্ট্ৰসংঘৰ বিশ্ববিদ্যালয় স্থাপনৰ নামত প্ৰৱঞ্চনা । ভুৱা প্ৰচাৰেৰে ধনী হোৱাৰ চক্ৰান্ত ডক্টৰেট ডিগ্ৰীধাৰী প্ৰৱঞ্চকৰ ৷ ডঃ অশ্বিনী শৰ্মা নামৰ এজন ব্যক্তিয়ে 2015 চনৰ পৰাই অসমত ৰাষ্ট্ৰসংঘৰ বিশ্ববিদ্যালয় স্থাপনৰ উৰাবাতৰি প্ৰচাৰ কৰি আহিছিল । কেৱল ইমানেই নহয়, চাকৰি দিয়াৰ নামত একাংশ লোকৰ পৰা লাখে লাখে টকা সৰকাইছে এইগৰাকী লোকে ৷ কিন্তু আজিকোপতি নিৰ্মাণ নহ'ল বিশ্ববিদ্যালয় ৷ অৱশেষত অতিষ্ঠ হৈ ভুক্তভোগীয়ে পত্ৰ প্ৰেৰণ কৰিলে ৰাষ্ট্ৰসংঘলৈ ৷ তাৰ পাচতেই ফাদিল হ'ল সমস্ত তথ্য ৷ ভুক্ত ভুগীৰ পত্ৰৰ উত্তৰত ৰাষ্ট্ৰ সংঘই জনাই যে, অসমত বিশ্ববিদ্যালয় স্থাপনৰ কোনো পৰিকল্পনাই নাই ৰাষ্ট্ৰসংঘৰ ৷
ৰাষ্ট্ৰসংঘৰ বিশ্ববিদ্যালয় স্থাপনৰ নামত অসমত প্ৰৱঞ্চনাৰ জাল ৰাষ্ট্ৰসংঘৰ পৰা এই তথ্য লাভ কৰাৰ পাচতেই 2018 চনত চন্দ্ৰ কুমাৰ শৰ্মা নামৰ এজন ভুক্তভোগীয়ে ডঃ অশ্বিনী শৰ্মাৰ বিৰুদ্ধে প্ৰৱঞ্চনাৰ অভিযোগ তুলি এজাহাৰ দাখিল কৰিছিল দিশপুৰ আৰক্ষী থানাত । উক্ত এজাহাৰৰ ভিত্তিত দিশপুৰ থানাত 3863/18 নম্বৰত ৰুজু হৈছিল এটা গোচৰ । কিন্তু আশ্চৰ্যজনকভাৱে বৰ্তমানলৈকে গোচৰটোৰ ক্ষেত্ৰত কোনো পদক্ষেপ গ্ৰহণ নকৰিলে দিশপুৰ আৰক্ষীয়ে ৷ আৰক্ষী আয়ুক্তক এই বিষয়ে অৱগত কৰোৱাৰ পাচতো কিন্তু গোচৰটোৰ প্ৰতি কোনো গুৰুত্ব প্ৰদান নকৰিলে আয়ুক্তগৰাকীয়ে ৷ যাৰে বাবে ক্ষোভ প্ৰকাশ কৰিছে অভিযোগকাৰী চন্দ্ৰ কুমাৰ শৰ্মাই । আনহাতে, গোচৰ সন্দৰ্ভত সাংবাদিকে সোধা প্ৰশ্নৰ উত্তৰত আৰক্ষী আয়ুক্ত দীপক কুমাৰে ঘটনাৰ তদন্ত চলি থকা বুলি কৈ বিষয়টোৰ পৰা ফালৰি কটাৰ চেষ্টা চলায় ৷ ৰাষ্ট্ৰসংঘৰ নামৰ ভুৱা প্ৰচাৰ চলাই প্ৰৱঞ্চনাৰ ফান্দ পতা এইজন ব্যক্তিৰ বিৰুদ্ধে আৰক্ষীয়ে কিবা ব্যৱস্থা গ্ৰহণ কৰিব নে? নে আইনৰ সুৰুঙাৰে পলাই সাৰিবলৈ সক্ষম হ'ব ডক্টৰেট ডিগ্ৰীধাৰী এইজন প্ৰৱঞ্চক ৷
