ৰাজ্যৰ প্ৰান্তে-প্ৰান্তে অব্যাহত কেব বিৰোধী প্ৰতিবাদ

মহানগৰীত সান্ধ্য আইন জাৰি কৰা হৈছে যদিও অব্যাহত আছে প্ৰতিবাদ ৷ ধুবুৰীত কেবক লৈ অব্যাহত আছে  ধাৰাবাহিক প্ৰতিবাদ ৷ বঙাইগাঁৱত প্ৰতিবাদকাৰী সকলে অভয়াপুৰীৰ বিজেপি কাৰ্যালয় লণ্ডভণ্ড কৰাৰ লগতে খগৰপুৰ বিজেপি কাৰ্যালয়ো লণ্ডভণ্ড কৰে ৷ বৰপেটাৰ হাউলীতো উত্তেজনাপূৰ্ণ পৰিস্থিতি ৷ বিধায়ক ৰণজিৎ দাসক হুংকাৰ বৰনগৰবাসীৰ ৷

নিউজ ডেস্ক, 12 ডিচেম্বৰ:মহানগৰীত সান্ধ্য আইন জাৰি কৰা হৈছে যদিও অব্যাহত আছে প্ৰতিবাদ ৷ মহানগৰীৰ প্ৰান্তে প্ৰান্তে ৰাইজে পথৰ ওপৰত টায়াৰ জ্বলাই, সমদল উলিয়াই উদাত্ত শ্নোগানেৰে প্ৰতিবাদ সাব্যস্ত কৰিছে ৷ সেনাৰ ফ্লেগ মাৰ্চ, কন্দুৱা গেছ প্ৰয়োগ, ৰাবাৰ বুলেট আদি নিক্ষেপকো আওকাণ কৰি ওলাই আহিছে সহস্ৰ জনতা ৷

ধুবুৰী:ধুবুৰীত কেবক লৈ অব্যাহত আছে ধাৰাবাহিক প্ৰতিবাদ ৷ আজি ধুবুৰী আইন মহাবিদ্যালয়ৰ পৰা আৰম্ভ হোৱা বিশাল প্ৰতিবাদী সমদলত অংশ লয় ধুবুৰী আইন মহাবিদ্যালয়, ধুবুৰী ভোলানাথ কলেজ আৰু ধুবুৰী আজমল কলেজকে ধৰি কেইবাখনো মহাবিদ্যালয়ৰ শিক্ষাৰ্থীয়ে ৷ সাংবাদিকৰ আগত তীব্ৰ ক্ষোভ উজাৰিলে একাংশ প্ৰতিবাদকাৰীয়ে ৷

বঙাইগাঁও:বঙাইগাঁৱত হেজাৰ হেজাৰ প্ৰতিবাদকাৰীক আক্ৰাছুৰ কেন্দ্ৰীয় মুখ্য কাৰ্যালয়ত আবদ্ধ কৰি ৰাখিছে বঙাইগাঁও আৰক্ষীয়ে ৷ প্ৰতিবাদকাৰী সকলে অভয়াপুৰীৰ বিজেপি কাৰ্যালয় লণ্ডভণ্ড কৰাৰ লগতে খগৰপুৰ বিজেপি কাৰ্যালয়ো লণ্ডভণ্ড কৰে ৷ ঠায়ে ঠায়ে আৰক্ষীয়ে লাঠীচালনা কৰাৰ লগতে শূণ্যলৈ গুলিচালনা কৰিও শান্ত কৰিব পৰা নাই পৰিস্থিতি ৷

বৰপেটা:বৰপেটাৰ হাউলীতো উত্তেজনাপূৰ্ণ পৰিস্থিতি ৷ মুখ্যমন্ত্ৰীৰ প্ৰেছ উপদেষ্টা পদৰ পৰা হৃষীকেশ গোস্বামীক পদত্যাগৰ দাবী জনায় ৰাইজে ৷ হাউলী চহৰত উপস্থিত দণ্ডাধীশ ৷ প্ৰতিবাদী ৰাইজে হাউলীত জ্বলালে বিজেপিৰ পতাকা ৷

সৰভোগ: সৰভোগৰ খিলঞ্জীয়াই বিধায়ক হিচাপে নিৰ্বাচিত কৰা ৰণজিৎ দাসৰ বিৰুদ্ধে তীব্ৰ ক্ষোভ প্ৰকাশ কৰি ক্ষমতাৰ পৰা গতিয়াই দিয়াৰো হুংকাৰ দিয়ে ৷ ৰণজিৎ দাসক সৰভোগৰ বিধায়ক হিচাপে বৰনগৰবাসীয়ে গণ্য নকৰে বুলি উল্লেখ কৰি ৰণজিৎ দাসক খলনায়ক আখ্যা দিয়ে ৷ আজি সৰভোগতো কেবৰ বিৰুদ্ধে তীব্ৰ প্ৰতিবাদ সাব্যস্ত কৰে স্থানীয় লোকে ৷

লগতে পঢ়ক:মাজুলীত বিজেপি, অগপৰ কাৰ্যালয় ভাঙিলে একাংশই