Mur Mati Mur Desh Program 2023: অমৃত বৃক্ষৰ পুলি ৰোৱাৰ পিচতেই এমাহলৈ ‘‘মোৰ মাটি মোৰ দেশ’’ কাৰ্যসূচী

‘‘অমৃত বৃক্ষ আন্দোলন’’ৰ লগত সংগতি ৰাখি ‘‘মোৰ মাটি মোৰ দেশ’’ কাৰ্যসূচী গ্ৰহণ ৷ 19 ছেপ্তেম্বৰৰ পৰা 26 অক্টোবৰলৈকে অসমত ‘‘মোৰ মাটি মোৰ দেশ’’ কাৰ্যসূচী ৰূপায়ন কৰা হ’ব বুলি ঘোষণা কৰিছে মুখ্যমন্ত্ৰীয়ে ৷

গুৱাহাটী, 17 ছেপ্টেম্বৰ : অসম চৰকাৰৰ উদ্যোগত 17 পৰা 20 ছেপ্টেম্বৰ নিশা 12 বজালৈ ‘‘অমৃত বৃক্ষ আন্দোলন’’ৰ বিশেষ কার্যসূচী গ্ৰহণ কৰিছে । এই আন্দোলনৰ লগত সংগতি ৰাখি আৰু এক নতুন কাৰ্যসূচীৰ ঘোষণা কৰে মুখ্যমন্ত্ৰীয়ে । অহা 19 ছেপ্তেম্বৰৰ পৰা 26 অক্টোবৰলৈকে অসমত ‘‘মোৰ মাটি মোৰ দেশ’’ কাৰ্যসূচী ৰূপায়ন কৰা হ’ব বুলি আজিৰ সংবাদমেলত ঘোষণা কৰে মুখ্যমন্ত্ৰী হিমন্ত বিশ্ব শৰ্মাই ।

সংবাদমেল যোগে মুখ্যমন্ত্ৰী হিমন্ত বিশ্ব শৰ্মাই ঘোষণা কৰি কয়, ‘‘স্বধীনতাৰ অমৃত মহোৎসৱৰ লগত সংগতি ৰাখি এই কাৰ্যসূচী গ্ৰহণ কৰা হৈছে । অহা 19 ছেপ্টেম্বৰত অসমৰ সকলো জিলা আয়ুক্তসকলে জিলাসমূহত একোখন ৰাজহুৱা সভা আয়োজন কৰি ‘‘মোৰ মাটি মোৰ দেশ’’ কাৰ্যসূচী ৰূপায়ন কৰিব ৷ 20 ছেপ্তেম্বৰৰ পৰা 1 অক্টোবৰলৈ অসমৰ প্ৰতিখন গাঁৱত আৰু 50 টা নিৰ্দিষ্ট পৌৰসভাৰ প্ৰতিখন ঘৰলৈ ক্লাৱ, আত্মসহায়ক গোট সদস্যই বিভিন্ন লোকৰ ঘৰে ঘৰে গৈ এমুঠিকৈ মাটি সংগ্ৰহ কৰিব । ফ্লেটত থকা লোকসকলে এমুঠি অন্ন বা চাউল দিব ।’’

তেওঁ কয়,‘‘2 অক্টোবৰত প্ৰতিখন গাঁৱৰ পৰা 200 পৰা 300 লোকে শোভাযাত্ৰা কৰি মাটি ভৰ্তি কলহটো সন্মুখত লৈ পঞ্চায়তলৈ যাব । আমি আশা কৰিছোঁ এখন গাঁও পঞ্চায়তত অতি কমেও 20 টা কলহ সমাবেত হ'ব । গাঁও পঞ্চায়ত কলহসমূহৰ মাটিখিনি এখন বগা কাপোৰত সানমিহলি কৰা হ'ব । মাটিখিনি প্ৰতিখন গাঁৱৰ মাটি সানমিহলি হৈ যাব । 2 অক্টোবৰ পৰা 7 অক্টোবৰত গাঁও পঞ্চায়তৰ কাৰ্যালয়ত ৰাখি থোৱা হ'ব উক্ত মাটিখিনি ।’’

‘‘8 অক্টোবৰৰ দিনা 300 লোকে পঞ্চায়তৰ পৰা কলহটো লৈ ব্লকৰ দিশে শোভাযাত্ৰা কৰি কলহ লৈ যাব । ব্লকলৈ অহা কেইবাটাও কলহৰ মাটি সানমিহলি হ'ব । ব্লকসমূহৰ এই কাৰ্যসূচী দুটা দিনত কৰা হ'ব । 50 শতাংশ জিলাত 8 অক্টোবৰ আৰু 50 শতাংশ জিলাত 15 অক্টোবৰ তাৰিখে এই কাৰ্যসূচী গ্ৰহণ কৰা হ'ব । পৰৱৰ্তী সময়ত ব্লকত থকা মাটি দুটা কলহত ভৰোৱা হ'ব । 25 অক্টোবৰলৈ এই কলহসমূহ ব্লকত থাকিব । ৱাৰ্ডৰ পৰা অহা মাটি খিনি পৌৰসভাত সানমিহলি কৰা হ'ব ।’’

‘‘25 অক্টোবৰ তাৰিখে পুৱা জিলা আয়ুক্তই নিয়োজিত কৰা এগৰাকী যুৱক বা যুৱতীয়ে কলহ দুটা লৈ গুৱাহাটীলৈ আহিব । 26 অক্টোবৰত গুৱাহাটীত এখন সভা অনুষ্ঠিত হ'ব । এই সভাত অসমৰ ৰাজ্যপালৰ লগতেই বহুকেইগৰাকী বিশিষ্ট ব্যক্তি উপস্থিত থাকিব । এই সভাত এই অমৃত কলহসমূহ সংগ্ৰহ কৰা হ'ব । 270 টা অমৃত কলহ কলাক্ষেত্ৰত ৰখা হ'ব । আন 270 টা অমৃত কলহ 27 তাৰিখে ৰাজধানী এক্সপ্ৰেছৰ দ্বাৰা দিল্লীলৈ লৈ যোৱা হ'ব’’ বুলি ঘোষণা কৰে মুখ্যমন্ত্ৰীয়ে ৷

‘‘28 তাৰিখে ৰাতিপুৱা দিল্লীত থকা অসমৰ ছাত্ৰ-ছাত্ৰী, পৰিয়ালসমূহে এই অমৃত কলহ অনুষ্ঠানিকভাৱে গ্ৰহণ কৰি অসম ভৱনলৈ সন্মানেৰে লৈ যাব । 30 অক্টোবৰ তাৰিখে কলহসমূহ তেওঁলোকে নেশ্যনেল ৱাৰ মেমৰিয়েলত লৈ গৈ তাৰ ওচৰত নিৰ্মাণ কৰা অমৃত উদ্যানত প্ৰধানমন্ত্ৰীৰ উপস্থিতিত এই মাটিখিনি বিলীন কৰি দিয়া হ'ব । ভাৰতৰ বিভিন্ন স্থানৰ পৰা 7500 টা অমৃত কলহ আহিব । অসমৰ বাকী থাকি যোৱা 270 টা কলহ 22 ডিচেম্বৰত সমদল কৰি গহপুৰলৈ লৈ যোৱা হ'ব । কনকলতা বিশ্ববিদ্যালয়ৰ আধাৰশিলাৰ কামত এই মাটি ভূমি পূজনত ব্যৱহাৰ কৰা হ'ব’’ বুলি সংবাদমেলত উল্লেখ কৰে মুখ্যমন্ত্ৰী গৰাকীয়ে ৷

লগতে পঢ়ক:Deepor Beel: অৱহেলিত দীপৰ‌ বিল; দীপৰ‌ বিলৰ‌ উন্নয়ন সম্পৰ্কত বিধানসভাত সাত বছৰে একেটা উত্তৰ