বৰ্জিত পানীৰে বিদ্যুৎ শক্তি উৎপাদনৰ প্ৰযুক্তি উদ্ভাৱন আই আই টি গুৱাহাটীৰ

আই আই টি গুৱাহাটীৰ গৱেষকৰ এটা দলে বৰ্জিত পানীৰ পৰা বিদ্যুৎ শক্তি উৎপাদন কৰিব পৰা এবিধ প্ৰযুক্তি উদ্ভাৱন কৰিছে (Technology innovation for power generation with wastewater) । গুৱাহাটী পৌৰ নিগম এলেকাৰ বৰ্জিত পানী পৰিশোধন প্ৰকল্পৰ ক্ষেত্ৰত এই প্ৰযুক্তি ব্যৱহাৰ কৰা হ'ব ।

গুৱাহাটী, 2 জুন :আই আই টি গুৱাহাটীৰ গৱেষকৰ এটা দলৰ আন এক সফলতা (IIT guwahati achievement) ৷ আই আই টি, গুৱাহাটীৰ গৱেষকৰ এটা দলে বৰ্জিত পানীৰ পৰা বিদ্যুৎ শক্তি উৎপাদন কৰিব পৰা প্ৰযুক্তি সম্বলিত এবিধ প্ৰযুক্তি উদ্ভাৱন কৰিছে (IIT Guwahati develops tech to generate green energy by treating wastewater) ।

এই প্ৰযুক্তিৰ দ্বাৰা অণুজীৱ ইন্ধন কোষ (মাইক্ৰ'বিয়েল ফুৱেল চেল) নামৰ এই জৈৱ বিদ্যুৎ ৰাসায়নিক আহিলাৰ সহায়ত প্ৰদূষণবিহীনভাৱে বিদ্যুৎ শক্তি উৎপাদন কৰিব পৰা যাব ৷ কেৱল বিদ্যুৎ শক্তি উৎপাদন লগতে আৱৰ্জনা নিষ্কাশনৰো কাম কৰিব পৰা হ'ব এইবিধ প্ৰযুক্তিৰ দ্বাৰা ।

উল্লেখ্য যে, কেন্দ্ৰীয় চৰকাৰৰ বিজ্ঞান আৰু প্ৰযুক্তিবিদ্যা বিভাগৰ পুঁজিৰে আই আই টি, গুৱাহাটীৰ ৰাসায়নিক ইঞ্জিনীয়াৰিং বিভাগে চলোৱা গৱেষণাৰ অন্তত এই ‘‘সেউজ বিদ্যুৎ উৎপাদন’’ কৰা প্ৰযুক্তি সম্বলিতআহিলা উদ্ভাৱন কৰিছে । অধ্যাপক মিহিৰ কুমাৰ পুৰকেইটৰ তত্ত্বাৱধানত গৱেষক ছাত্ৰ মুকেশ শর্মাই এই গৱেষণা কৰিছিল ।

তেওঁলোকে উদ্ভাৱন কৰা এই জৈৱ বিদ্যুৎ ৰাসায়নিক আহিলা অণুজীৱৰ জৰিয়তে জৈৱ পদাৰ্থত থকা ৰাসায়নিক শক্তিক বৈদ্যুতিক শক্তিলৈ পৰিৱৰ্তন কৰে । এই প্ৰযুক্তি সম্বলিত আহিলাৰ সহায়ত কম খৰচত বৰ্জিত পানীৰ পৰা বিদ্যুত উৎপাদন কৰি বিদ্যুতৰ অভাৱ পূৰণ কৰিব পৰা যাব ৷

এনেদৰে উৎপাদন কৰা বিদ্যুৎ অন্য ব্যয়বহুল পদ্ধতিৰে উৎপাদন কৰা বিদ্যুৎ শক্তিৰ বিকল্প হ'ব বুলি গৱেষণাৰ তত্ত্বাবধায়ক অধ্যাপক পুৰকেইটে মন্তব্য কৰে । আই আই টি, গুৱাহাটীৰ সঞ্চালক অধ্যাপক টি জি সীতাৰমণে কয় যে, এই প্ৰযুক্তিয়ে নৱীকৰণযোগ্য শক্তি উৎপাদনৰ ক্ষেত্ৰত নতুন আশাৰ সঞ্চাৰ কৰিব ।

তেওঁ জনায় যে, গুৱাহাটী পৌৰ নিগম এলেকাৰ বৰ্জিত পানী পৰিশোধন প্ৰকল্পৰ ক্ষেত্ৰত এই প্ৰযুক্তি ব্যৱহাৰ কৰা হ'ব ।

লগতে পঢ়ক :মহাবিদ্যালয়ৰ চৌহদত প্ৰবক্তাই কৰিলে সুৰাপান: প্ৰতিবাদত উত্তাল মহাবিদ্যালয়