গুৱাহাটী, ১৩ জুন: ৰাজ্যত ক্ৰমাৎ হ্ৰাস পাইছে কৰ'ণাৰ সংক্ৰমণ । কৰ'ণাৰ সংক্ৰমণ হ্ৰাস পোৱাৰ পৰিপ্ৰেক্ষিতত এতিয়া পৰ্যায়ক্ৰমে নীতি-নিৰ্দেশনা কিছু শিথিল কৰাৰ চিন্তা চৰ্চা কৰিছে ৰাজ্য চৰকাৰে । অৱশ্যে সকলো জিলাতে কৰ'ণাকেন্দ্ৰীক নীতি-নিৰ্দেশনা শিথিল কৰাৰ সম্ভাৱনা নাই । ক'ভিড (COVID-19)ৰ পৰিস্থিতি উন্নত হোৱা জিলাসমূহত বৰ্তমান প্ৰযোজ্য হৈ থকা নীতি-নিৰ্দেশনা কিছু শিথিল কৰা হ'ব । দেওবাৰে এই সন্দৰ্ভত এক স্পষ্ট ইংগিত দিয়ে স্বাস্থ্যমন্ত্ৰী কেশৱ মহন্তই ৷
সংবাদ মাধ্যমৰ আগত স্বাস্থ্যমন্ত্ৰীগৰাকীয়ে কয়, ১৫ জুনৰ পাচত কিছু শিথিলতা অনা হ'ব । জিলাভিত্তিক পৰ্যালোচনাৰ ওপৰত নিৰ্ভৰ কৰিব শিথিলতা । কিন্তু ১৫ জুনলৈ বাহাল থাকিব স্বাস্থ্য বিভাগৰ প্ৰযোজ্য নীতি-নিৰ্দেশনাসমূহ । তাৰ পাচৰ পৰ্যায়ৰ বাবে চিন্তা- চৰ্চা কৰি থকা হৈছে । যিবোৰ জিলাত পৰিস্থিতি উন্নত হোৱাৰ দিশে আগবাঢ়িছে সেই জিলাসমূহত কিছু শিথিলতা অনা হ'ব । মুখ্যমন্ত্ৰীয়ে সকলো কথা দুই-এদিনতে ঘোষণা কৰিব । গুৱাহাটী, নগাঁও আদিত পৰিস্থিতি আৰু উন্নত হ'ব লাগিব ।