গুৱাহাটী, ১৩ ফেব্ৰুৱাৰী: বিত্ত মন্ত্ৰী ডঃ হিমন্ত বিশ্ব শৰ্মাই শুকুৰবাৰে বিধানসভাত দাখিল কৰা লেখানুদানক নিৰ্বাচনকেন্দ্ৰিক একধৰণৰ ইস্তাহাৰ বুলি আখ্যা দিছে বিৰোধী দল কংগ্ৰেছে । জ্যেষ্ঠ কংগ্ৰেছ নেতা তথা প্ৰাক্তন মন্ত্ৰী এতোৱা মুণ্ডাই আজি লেখানুদান সন্দৰ্ভত প্ৰতিক্ৰিয়া প্ৰকাশ কৰি এক তাৎপৰ্যপূৰ্ণ মন্তব্য আগবঢ়ায় ।
"অসমৰ ৰাইজ মদাহী নেকি ?" লেখানুদান দেখি প্ৰশ্ন প্ৰাক্তন মন্ত্ৰী এতোৱা মুণ্ডাৰ
প্ৰাক্তন মন্ত্ৰীগৰাকীয়ে কয় যে, "পেট্ৰ'ল-ডিজেলৰ দাম হ্ৰাস কৰিবলৈ বিত্ত মন্ত্ৰীয়ে কৰা ঘোষণা আদৰণীয় । কিন্তু তাকে কৰোঁতে নিৰ্বাচনৰ সময়লৈ চৰকাৰখন ৰ'বলগীয়া হ'ল কিয় ? ইয়াৰ বহু পূৰ্বেই ইন্ধনৰ মূল্য হ্ৰাস কৰিবলৈ চৰকাৰে যথেষ্ট সুযোগ পাইছিল । তেতিয়া কিয় হ্ৰাস কৰা নহ'ল ? আনহাতে, দৰৱকে ধৰি বহু নিত্য ব্যৱহাৰ্য সামগ্ৰীৰ মূল্য আকাশলংঘী হৈছেগৈ । সেইবোৰৰ দাম হ্ৰাস কৰাৰ পৰিৱৰ্তে সুৰাৰ মূল্যহে হ্ৰাস কৰাৰ কাৰণ কি ?"