গুৱাহাটী,24 ছেপ্তেম্বৰ: অসম আৰক্ষীৰ উপ-পৰিদৰ্শক পদৰ নিযুক্তি কেলেংকাৰীক কেন্দ্ৰ কৰি তোলপাৰ ৰাজ্য ৷ এই কেলেংকাৰীত এতিয়া নাম সাঙোৰ খাইছে নামী-দামী ৰাজনৈতিক নেতা-পালিনেতাৰ ৷ আৰক্ষীৰ প্ৰাথমিক তদন্তত এই মুহুৰ্তলৈকে পোহৰলৈ আহিছে বহু বিস্ফোৰক তথ্য ৷ অভিযানকাৰী দলে সোধ-পোচৰ বাবে আটক কৰিছে প্ৰায় বাৰগৰাকী লোকক ৷
বুধবাৰে নিশাৰ পৰা মহানগৰ ক্ৰাইম ব্ৰাঞ্চ আৰু চিআইডি-ৰ এটা দলে অসম আৰক্ষীৰ অৱসৰপ্ৰাপ্ত ডিআইজি পি কে দত্তৰ বাসভৱনৰ লগতে দত্তৰ বিলাসী হোটেল হোটেল ভাৰ্গৱত তালাচী চলায় ৷ এই অভিযানকালত বুধবাৰে নিশা প্ৰায় 5 কিল’গ্ৰাম সোণৰ আ-অলংকাৰৰ লগতে বহু আপত্তিজনক নথি-পত্ৰ জব্দ কৰে ক্ৰাইম ব্ৰাঞ্চে ৷ বৃহস্পতিবাৰে পুৱাৰ পৰা পুনৰ অসম আৰক্ষীয়ে অভিযান চলাইছে পি কে দত্তৰ ভাৰ্গৱ হোটেলৰ লগতে আন পাঁচখন বিলাসী হোটেলত ৷ অৱশ্যে এই পৰ্যায়লৈকে অভিযানকাৰী দলটোৱে সংবাদ মাধ্যমৰ আগত অভিযান সন্দৰ্ভত কোনো কথা অৱগত কৰা নাই ৷ আৰক্ষীৰ এই অভিযানৰ বিষয়ে জানিব পাৰি নিশাৰ ভাগতে বাসগৃহৰ পৰা পলায়ন কৰিছে প্ৰাক্তন ডিআইজি গৰাকী ৷ বৃহস্পতিবাৰে সন্ধিয়াৰ ভাগলৈকে আটক হোৱাৰ সম্ভাৱনা আছে পি কে দত্ত ৷
লগতে চাওকঃসুৰামত্ত ই-ৰিক্সা চালকক গণপ্ৰহাৰ
